[愛情無限loop] 就係咁，我做左女神一年既備胎: １１５　唔好後悔

時間愈黎愈少，好快就到左星期五既早上，今日一早老牛大人就叫左我起身，話叫我做好準備所以要同我再講一次既計劃。

「阿爸啊，尋晚未講左十幾次囉。」我都未話過咁早訓醒。

「準備多Ｄ，一陣唔好有咩錯嘛。」老牛大人話，講完，我情願一陣錯晒仲好，ＪＵＤＹ係齊歡唱下比ＣＯＷ求婚，一定嬲都爆。

最後老牛大人講左三次後先放我返工，返工果陣，我收到阿琪既ＭＳＧ。

阿琪：今日ＣＯＷ就求婚
我：係啊


阿琪：你估，會發生Ｄ咩事？
我：唔知架
我：但係我覺得呢幾日既ＣＯＷ好心不在焉
阿琪：因為ＪＵＤＹ唔理佢？
我：唔係
我：好似諗緊其他野咁
阿琪：諗緊咩？
我：唔知（喊笑）
阿琪：（喊笑）
阿琪：如果今日ＪＵＤＹ唔去既話，ＣＯＷ未好慘囉


我：係架
我：但佢唔會唔去掛
阿琪：好難講啊，ＣＯＷ係ＪＵＤＹ心目中既地位咁低，話唔去就唔去有幾難
我：咁又係

我無諗過呢個咁又係，最後會成真。

係放工既時間，６點３０分，ＣＯＷ今日特登請假無返工，去準備所有既野，而能蟹同老牛大人都係，而我就同佢地講放工後即刻去幫佢地手。

但點知到左６點４０分果陣，ＣＯＷ收到ＪＵＤＹ既一個ＭＳＧ，佢睇完個ＭＳＧ後，成個人謝晒咁坐左係到，一粒聲都無。



見有Ｄ唔妥行過去問佢：「做咩啊？緊張到呆晒咁既。」

而ＣＯＷ就話：「ＪＵＤＹ……佢話唔黎。」佢既眼神，好空洞，好無神。

佢呢句話一講左出黎，能蟹同老牛大人就衝左過黎話：「唔係掛，所有野都準備好晒，個主角竟然ＮＯ　ＳＨＯＷ。」有英文既呢句就緊係能蟹仔講架啦。

而老牛大人就拍一拍ＣＯＷ既膀頭，同佢講：「失敗乃成功之母。」係！我地知啊！但而家講呢句無咩幫助囉阿老牛大人。

ＣＯＷ好無力咁將佢手中剛剛採排拎住既花，無力咁放手，跌左落地，佢嘆左嘆氣，呢一個嘆氣佢好用力，好似，想將所有冤屈氣都呻晒出黎。

「點解？點解我要做咁多野去為一個咁樣既人？無論我做到幾辛苦，幾累，幾好，佢知咩？佢唔知啊，佢咩都唔知啊！佢咩都唔撚知啊！！！」

現場就係因為呢一句說話，所有請返黎既舞蹈員都望住佢，而能蟹同老牛大人見到咁，就叫左佢地行開先，剩低既，就得返我同ＣＯＷ。



「阿牛，係我聽到你話叫我做返自己果陣，我真係有諗架，我真係有諗如果我做返自己，ＪＵＤＹ會鐘意我Ｄ咩，但我諗黎諗去我都諗唔到，我本身係好鐘意係屋企度ＨＥＡ既人，我本身係好鐘意靜既人，我本身係好想建立家庭既人，呢地係我本身想做既野，但如果我做呢Ｄ野，ＪＵＤＹ真係會鐘意我咩？佢會話我成日係屋企，會話我悶，話我係毒男，如果我粒聲都無，佢就會話我唔識講野哄佢，我同佢一齊果陣佢好似對住空氣，建立家庭，佢諗都無諗過，又或者，佢唔想同我建立家庭。」

我望住而家呢一刻既ＣＯＷ，覺得佢好可憐。

「我愈諗就愈驚，驚既唔係因為ＪＵＤＹ會唔鐘意我，而係驚原來鐘意ＪＵＤＹ我要放棄自我，咁樣落去，我真係會開心咩？我同ＪＵＤＹ真係會幸福咩？」佢講完之後，自己笑左出黎。

「我做返自己，可能就唔會咁愛ＪＵＤＹ，你知唔知件事有幾咁矛盾啊阿牛？」佢既笑，係帶住可笑，佢覺得而家既自己好可笑。

同頭先一樣，我覺得佢好可憐，好同情佢，咁樣，ＣＯＷ同ＪＵＤＹ就有救拿。

而係呢一刻，ＣＯＷ既電話又響起，係ＪＵＤＹ既ＭＳＧ，佢無力拎起電話，睇完之後同我講：「佢話而家又可以過黎。」

我睇一睇自己電話個鐘，顯示時間係６點５８分，係呢三個字入面，點解一個女人可以做出咁既變動？定係，上天想比機會ＣＯＷ？

我拎起左跌左落地既果束花，遞到ＣＯＷ既面前，而ＣＯＷ一臉疑惑好唔好拎住呢束花，而我，就好認真同佢講左一句：「係男人既，要做既野就要做到底，唔好以後後悔當初。」



ＣＯＷ拎左束花，企左起身，「係，唔會後悔。」