[愛情無限loop] 就係咁，我做左女神一年既備胎: １１４　練兵

距離ＪＵＤＹ同阿琪話要約埋跑ｇｒｏｕｐ　飲野既約有一個星期，但係，我覺得呢一個約會約唔成，因為，ＣＯＷ既快閃求婚大作戰，係定左今個星期五，亦姐係飲野前既一日。

我覺得，呢次既求婚都唔會成功，因為，我想佢唔成功。

係星期五日前，阿ＣＯＷ佢好努力咁好聽我地話，排舞、練歌、計劃要講既對白，佢除左返工外，就係全心全意去做呢一件事。

係呢一個時期，ＣＯＷ仍然有每日同ＪＵＤＹ　ｍｓｇ，但就無時間見佢，不過，呢個對ＪＵＤＹ無咩影響，因為，係ＣＯＷ陪唔到ＪＵＤＹ果陣，ＪＵＤＹ去左搵Ｂ男。

我每次見到ＣＯＷ身水身汗咁練舞時，見到ＪＵＤＹ係個ｇｒｏｕｐ入面話比我同阿琪知佢去搵Ｂ男，講完，係會有少少替ＣＯＷ唔甘心，但我又可以點，呢樣，係ＣＯＷ自己選擇。



每晚練到好夜果陣，我地都會休息一下吹下水，而ＣＯＷ就自己一個人，對住部手機發呆。

「做咩自己一個人坐開啊？」我行到ＣＯＷ既背後問佢，但佢好似無會意到我企左係佢後面，我望一望佢所注視既手機，發現畫面係停留左係佢同ＪＵＤＹ既ｃｈａｔ　ｒｏｏｍ　入面，ＪＵＤＹ個名下面，「在線上」呢三個未顯示出黎，但就無回應ＣＯＷ既ｍｓｇ，我見到ｃｈａｔ　ｒｏｏｍ　入面，包含住既都只係ＣＯＷ既ｍｓｇ，ＪＵＤＹ既，一個都無……

呢個時候，我拍一拍ＣＯＷ既膀頭，佢而家先會意到我係佢身後面，嚇左一跳，而我，就同佢講：「唔好亂諗野，影響到你既心情。」

ＣＯＷ無出過聲，只係繼續望住部手機。

「你望住都無用架ｗｏ。」我話。



而ＣＯＷ就講：「你上次，話做返自己既人先可以吸引到自己所愛既人，你有無實行過啊？」

比佢咁樣一問，我當場打左個突，「有無啊……有啊……」係呢個時候，我只可以話比佢有，咁樣先可以鼓勵到佢。

「真既？」佢又問，而我今次只係點一點頭。

「但係，我問過自己，如果真係做返自己，仲會唔會……」ＣＯＷ唔敢講落去，但我知道佢想講既，係可能唔會再為ＪＵＤＹ做任何無回報既野。

而我就話：「起馬當你做返自己既時候，會開心ｄ，睇既野，會唔同ｄ。」我答佢，而呢個都係我自己領教過既。



「可能，好似你所講咁，我做返自己會開心ｄ。」ＣＯＷ關左手機，然後企左起身話：「我想練多陣。」

我微笑左一下：「好。」

能蟹仔陪緊ＣＯＷ一齊跳，而早已經喘晒氣既老牛大人就行去我旁邊，同我講：「今日ＣＯＷ跳舞果陣，多左ｄ樣野。」

「係咩野？」我問老牛大人。

「多左份執著，但，唔係為左佢條女。」老牛大人答。

「咁係ｄ咩？」我問佢。

而老牛大人只係笑左笑，「呢ｄ野，你明過我啦。」

下，佢呢一句好耐人尋味ｗｏ。