[愛情無限loop] 就係咁，我做左女神一年既備胎: １１２　大檸樂

同ＣＯＷ傾多左陣，雖然佢都係圍繞住ＪＵＤＹ　Ｄ野黎講，但好似，仍既心境開始有少少變，雖然，只係少少，微乎其微。

「佢地走晒未？」阿琪問我。

「走晒拿。」我嘆左口氣，「唔知頭先妳果句，幫唔幫到ＣＯＷ呢？」

「點知，你講既又唔係我講。」阿琪笑得好開心咁話：「我肚餓啊，陪我食野。」唔知幾時開始，阿琪對我提出要求時已經無左問我好唔好，而係好似覺得我成會答應。

係唔係命令？又未算，不過，呢個感覺都幾好。



我地去左一個比較遠既餐廳，因為怕比老牛大人同能蟹見到，雖然佢地應該返晒去無咩可能，但係安全Ｄ好Ｄ。

「頭先佢地話用齊歡唱果陣，我真係完全Ｏ晒咀。」阿琪話。

「我都係，我都無諗過ＪＵＤＹ會鐘意星爺。」我答。

「你會唔會係將個重點放錯左呢……」阿琪白左一眼，然後我傻笑起黎，佢就望住我話：「真係如果佢真係唱呢隻歌向ＪＵＤＹ求婚，ＪＵＤＹ一定火都黎。」

「我都係咁諗。」我附和一下。



「係呢，阿ＣＯＷ有無講過佢先前Ｄ求婚係點架？」阿琪問。

「有啊，都幾白痴架。」我話。

「有幾白痴啊。」阿琪好奇一問，然後好期待我既答案。

「佢話有一次將個戒子放落蛋糕入面，諗住ＪＵＤＹ食到後佢就拎隻戒子求婚……」「ＪＵＤＹ吞左！」我未講完阿琪就搶住估，「唔係，個戒子硬得滯整到ＪＵＤＹ咬崩左隻牙。」

「唔掛得見ＪＵＤＹ好似有隻牙崩崩地啦。」阿琪話。



「有咩？我唔覺既。」我答佢。

「有啊，好入。」我真係無妳咁留意ＪＵＤＹ把口。

「仲有一次……」我講一講就笑，因為諗起真係好可笑，「你唔好笑住啦，講完先啦。」

「……佢……佢係ＪＵＤＹ就訓著果陣幫佢戴戒子求婚……」「哈哈哈哈哈哈哈哈哈！！！！」我都未講完阿琪已經笑成咁，「ＪＵＤＹ訓醒無啦啦見到自己戴左戒子，嬲嬲地咁除左出黎鬧爆佢。」

阿琪笑到眼淚水都流埋出黎，「抵鬧……笑到好辛苦啊……」

係呢個時刻，我見到遠處有一個身影好熟……係啊，又係呢招啊……唔好問我點解又會見到一個熟既身影，我出街真係好易撞到熟人。

我望一望果個人，「喂，阿琪，妳睇下，係ＪＵＤＹ啊。」阿琪聽到我咁講好，都好驚訝咁望一望我所指既地方，「真係ＷＯ，果個男既係……」

ＪＵＤＹ同緊一個男人食飯，睇得出佢果樣好冧咁，但係個男仔就唔多理佢。



「Ｄ野好唔好食啊～」唔撚係掛，ＪＵＤＹ咁樣講野真係第一次聽ＷＯ……除左果次佢扮聲串呂晨，今次ＪＵＤＹ係百分百真心架。

「嗯。」個男人好ＣＯＯＬ咁點一點頭，無理佢。

「咁一陣上你到好唔好啊～」頂！真係會毛管動架！可唔可以比返個正常既ＪＵＤＹ我啊。

「唔可以，今晚約左人，我趕時間走先，妳自己埋單啦。」個男一講完就走左，而ＪＵＤＹ好似有野想講都無講到，只係目送個男仔走。

見到咁，我同阿琪打左個眼色，「你係未諗緊我諗緊既野？」阿琪問我。

「我諗我而家應該係諗緊妳諗緊我諗緊既野。」其實我都唔知自己講咩，總之兩個人係諗緊同一樣野啦。

我地慢慢行近ＪＵＤＹ，「喂！」一下大叫，嚇到ＪＵＤＹ成個彈起，咁岩佢飲緊杯檸樂倒左係佢既身上面，「屌！邊撚個仆街係度大……叫……」呢個語氣既ＪＵＤＹ未幾好，「點解你地兩個係度架！？」ＪＵＤＹ一副驚訝望住我地。



而係呢個時間，頭先果個男人折返，「我留左個袋……」個男人望住我同阿琪問：「你地係邊個？」

呢一刻，我、阿琪同ＪＵＤＹ個樣就好似佢打瀉果杯野一樣，大檸樂咁望住個男人。