[愛情無限loop] 就係咁，我做左女神一年既備胎: １１１　做返自己

就係佢地講完佢地偉大既計劃後，我聽到耳機中阿琪把聲係一次又一次既嘆氣，聽到佢不停咁嘆氣，我既內心不知幾咁愧疚，因為我好似咩都幫唔到咁。

而食完野，埋單走人，我同老牛大人話想行多陣，佢就同我講：「未咁夜啊，如果係去搵女搞野就夜Ｄ都唔拘。」

我無奈地望住佢遠去，而企係我旁邊既能蟹同ＣＯＷ就話：「真係羨慕你有個咁樣既老豆。」我聽到佢後，望住前方正走緊既老牛大人，佢行行下仲差Ｄ跌親，「係啊，我都覺得有佢做我老豆好好。」

能蟹佢因為同我地唔同路，所以走先，而我同ＣＯＷ就一齊行，「你呢，你點解話要行多陣既？」ＣＯＷ問我：「有下場啊？」

「唔係啊，我想問你少少野姐？」我話：「其實，你同ＪＵＤＹ搞到呢個情況，你就話可能因為你之前都有對佢唔住同其他女人一齊，所以佢唔多理你，但係而家佢同另一個男人一齊，你係知道，但點解你仲要做咁多野去挽留佢？」



ＣＯＷ聽到我既提問後，一粒聲都無，只係呆左咁望住我，而我就同佢講：「定係，你覺得你欠左佢，所以佢都可以咁做？」

ＣＯＷ被我問到好無奈咁搖一搖頭，「其實，我都唔知點解會一直為佢做咁多野，有時諗到好卑躬屈膝對佢，佢都只係無動於衷，想放棄，又好唔甘心……」呢個情況應該好似老牛大人講過既放下既勇氣。

我聽到佢咁講後，笑左笑，估唔到先前我覺得ＪＵＤＹ放唔下A男，所以唔同ＣＯＷ一齊住，而家原來ＣＯＷ都係咁既情況。

所以，要佢地係埋一齊，只有一個方法。

「咁，你真係覺得值得咁做咩？」我問佢，佢唔敢直視我，「你已經求左好幾次婚佢都拒絕，你就好似佢既侍從一樣為佢執頭執尾佢都好似唔多理你，甚至你已經就佢就到出晒面，佢都……」



「夠拿！」佢捉住我既衫袖，「你唔好再係我面前講呢Ｄ野！我……我……」

「其實你都知道佢係個點既人，佢點對你，佢個心係邊度，你係知既。」我無理佢既怒氣，繼續講我要講完既說話。

而佢只係靜左咁望住我，然後好用力推開左我後，同我講：「我愛佢啊！！！我愛佢啊！！！我好愛佢啊所以我咁做啊！！！我係ＯＮ９！白痴！但我愛佢又可以點ＷＯ！」

「你好愛佢又點啊！佢而家唔撚愛你啊仆街！」我答佢。

佢聽到我呢句後就好似比人打左一拳重擊一樣，眼神空洞，眼淚流出，我感覺到，呢個係無助既眼淚……佢跪左係地上面，不停話：「究竟，我要點做佢先會愛我啊……我而經好累拿……我唔想再咁拿……」



係呢一刻，阿琪係耳機同我講左一句，叫我照直話佢知，「做返自己，先至可以吸引到你愛既人注視你。」

「做返……自己……」ＣＯＷ望住我，然後企左係身，「做返自己，多謝你，阿牛。」

點解佢好似收到Ｄ　ＭＳＧ咁，但我又唔知佢收到Ｄ咩野ＭＳＧ。