[愛情無限loop] 就係咁，我做左女神一年既備胎: １０５　有請軍師

我望住ＣＯＷ　Ｄ　ＭＳＧ，點諗都唔通，識左ＪＵＤＹ雖然唔耐，但係佢既性格，係直腸直肚，有咩就講咩，烈女一名，你話同佢吹水，稱兄度弟就ＯＫ姐，而家要哄佢，仲要幫ＣＯＷ令到ＪＵＤＹ有應覺，其實都好難。

係……我係Ｋ房有話過要幫ＪＵＤＹ搵返對ＣＯＷ既愛情感覺，但係都比我諗下先得架，我點會合道呢個機會黎得咁突然，中六合彩又唔見我中。

而我仲諗好唔好同阿琪講，不過如個比阿ＣＯＷ煩埋阿琪既話，阿琪一定會嬲我，都係唔好比佢知。

但係！但係我應該點做好！！！

係呢個時候，我望住房既門，線視慢慢移落，望住個門鎖……門鎖……只要係向某一方向好大力擰把鎖，就可以扭壞佢再打開度門……能蟹仔……花花公子……軍師……軍師！！！係ＷＯ，可能可以搵佢幫手ＷＯ。



唔好問我點解我望住把鎖會無啦啦諗到佢，我自己都唔知點解。

不過，要搵一個唔比佢知道內情既方法而又可以問佢點哄女仔……咁……不如就犧牲少少啦。

我：能蟹仔，有野想你幫手
能蟹仔：有咩幫到手啊巴打
我：關於哄女仔既
能蟹仔：（奸笑）
能蟹仔：阿琪啊？
我：你當係住先啦


能蟹仔：（奸笑）
我：點啊
我：幫唔幫啊？
能蟹仔：你出到聲一定幫架
能蟹仔：想幾時？
我：你幾時得？
能蟹仔：ａｎｙｔｉｍｅ　都ｒｅａｄｙ
我：咁聽日？
能蟹仔：駛唔駛咁急啊你
我：又係你話ａｎｙｔｉｍｅ　ｒｅａｄｙ


能蟹仔：（奸笑）
能蟹仔：就聽日啦咁
我：好啊
我：不過我有個朋友都想聽埋一份
我：你介唔介意？
能蟹仔：見係你，無問題
約左能蟹仔後，就話左比ＣＯＷ知，佢緊係好爽快咁答應左啦，而我就繼續諗，聽日我應該點問能蟹仔點哄阿琪……唔係，應該係點樣婉轉地幫ＣＯＷ問野好。

而到左另一日，我地約左係一個大排檔度見。

「男人既浪漫，豆腐火腩飯，大啤，大排檔，約係呢度傾男人野就最正。」能蟹仔好熟練咁開左支大啤，然後幫ＣＯＷ倒酒。

「我少少得架拿，我唔係幾飲得。」ＣＯＷ話。

「飲酒唔駛飲唔飲得，最近要係有得飲就飲，明唔明啊。」能蟹仔一副專家上身咁話。



「硬頸牛，你自己黎拿ＷＯ，大家咁熟就唔招呼你拿。」我聽到佢咁講後笑左笑回應佢。

「係呢，我想問女仔要點哄架？」嘩，阿ＣＯＷ，都未開始食野你就入正題，而且，頭先未同你講左今日要扮係我問野，而你係旁邊聽，而家你咁心急，咁未比能蟹仔知道係你想知囉。

而能蟹仔見到阿ＣＯＷ咁問，笑左笑話：「你都幾急下架ＷＯ。」佢食左幾舊肉後，再飲啖酒話：「女人要哄唔難，最緊要係你睇唔睇得出佢要你哄既時機。」

「時機？」我同阿ＣＯＷ同時問。

「緊係啦，唔係你以為一味哄就有用架拿。」能蟹仔講完後伸出左三隻手指對住我地，然後話：「你地要知道三點，女人最想比咩野人哄？女人咩野時候想人哄佢？女人最想人哄佢Ｄ咩？」

「願聞其詳。」我地兩隻牛話。

「女人最想比自己覺得岩ＦＥＥＬ既人哄，無論係未得米，又或者得左米，甚至好朋友，剛剛識既人，如果佢地對果個人無ＦＥＥＬ，就算點樣哄都好，係一眾女人眼中都只會覺得果Ｄ人口花花，嚴重既，佢地只會覺得睇緊馬騮戲。」能蟹仔話，然我地聽到津津有味咁食緊面前Ｄ野。



「女人想比人哄既時候，佢地會明示或者暗示，明示做出面係想你地令到佢地更開心，暗示係想你地哄返佢開心，當然啦，呢段等人哄既時間係會慢慢冷卻，而如果你係佢地冷卻後先哄返佢，佢地就會話你地不識情趣，呆板，總之所有唔好既野都會標籤係你身上。」我地含住啖飯表示認同。

「而女人點解想比人哄，原因唔係只為左想開心咁簡單，而係想知道自己係果個人心目中既地位去到邊度，因為就好似頭先講既第一點咁，女人只會比岩ＦＥＥＬ既人哄，所以，佢地都想係呢班岩ＦＥＥＬ既人當中有一定既地位，但如果佢地覺得地位不保既話，咁就，ＯＯＰＳ，ＧＯＯＤＢＹＥ。」能蟹仔講完後，望一望眼前既空碟話：「你地兩條友你食野定問野架？」

「兩樣都係。」我地兩隻牛傻笑話。