[愛情無限loop] 就係咁，我做左女神一年既備胎: １０３　食魚蛋

對住個咪大大聲講就易姐，但係要實行，好難，同埋都唔知可以點實行，陪左ＪＵＤＹ唱左成晚Ｋ，果Ｄ關於三角戀既歌全部唱晒，我諗佢都應該發泄夠掛，就係準備走既時候，ＪＵＤＹ電話響起，係Ｂ男，姐係好愛佢果個男人。

「喂……係啊，就快唱完……接我，好啊，順便車埋我朋友……肚餓啊，一陣車完我朋友車我去食野……係咁啦，到就話我知。」ＪＵＤＹ講完就ＣＵＴ線。

「邊個？」我問。

「Ｂ男啊。」ＪＵＤＹ答。

竟然，頭先果通電話完全感覺唔到言語間有愛意，如果佢唔話我知係Ｂ男，我只會覺得佢係同一個普通到平常既野傾緊電話。



如是者唱多左幾首，ＪＵＤＹ電話又響，係Ｂ男，佢打比ＪＵＤＹ話已經到左樓下，咁我同阿琪都快手快腳執野準備走，但點知ＪＵＤＹ話：「唔駛咁快啦，我仲有幾隻想唱既歌未唱啊。」

落到去，已經係四十五分鐘既事，一落到樓，我地就見到一架藍色既ＧＴＯ停左係附近，但車上面坐住既係一個好普通既毒男。

ＪＵＤＹ慢慢咁行過去，而個毒男就開左門行左出黎，行向ＪＵＤＹ度話：「我買左Ｄ野妳食啊。」佢手拎住左一碗魚蛋，「我啦，比我。」ＪＵＤＹ只係好敷衍咁應左佢一句後，就拎左碗魚蛋上車，而上車果陣就話：「佢地兩個係我朋友啊，住我附近。」

「你好。」個毒男同我地打左聲招呼。

「……你好。」我同阿琪不知幾尷尬，ＪＵＤＹ又無介紹，我都唔知好唔好問個毒男係未ＪＵＤＹ既男朋友。



上左車後果位毒男就開車，係車上面，就只有ＪＵＤＹ食魚蛋既聲音，全程車我同阿琪都無出聲，而果位毒男……姐係Ｂ男，都無咩點講過野，只係問左ＪＵＤＹ幾句：「唱得開唔開心啊頭先？Ｄ野係岩唔岩食啊？要唔要飲野？」

佢問埋晒呢Ｄ咁ＯＮ９既問題，ＪＵＤＹ都只係ＨＥＡ佢算，一到屋企樓下，我同阿琪就落左車，而ＪＵＤＹ就話一陣ＭＳＧ傾，我同阿琪聽到後只係點一點頭回應。

望住Ｂ男架車遠去，阿琪望一望我話：「我都想食魚蛋。」

「你個為食豬，而家呢個鐘數應該有車仔檔，去睇下有無魚蛋食啦。」我答佢。

「好野。」阿琪好開心咁笑住行。



「頭先呢，你覺唔覺ＪＵＤＹ同個Ｂ男係零交流？」阿琪問我。

「係啊。」我點頭答佢，然後講：「Ｂ男都好努力搵話題，但ＪＵＤＹ都唔想認佢咁。」

「咁Ｂ男問果Ｄ野咁怪，ＪＵＤＹ去完玩後，點會問佢唱得開唔開心架，傻既先問呢Ｄ。」阿琪一副專家上身講。

「咁應該問Ｄ咩野？」我問佢。

「緊係問你有無掛住我之類啦，雖然都係ＯＮ９，但起馬好過問佢開唔開心。」阿琪答。

「喔……明白。」然後我問佢：「咁你有無掛住我啊？」呢個我擺明係講笑，而阿琪聽到我咁講都爆笑左。

去到Ｄ車仔檔度，買左Ｄ野食，食食下，ＪＵＤＹ就係個三人ＧＲＯＵＰ度講：

ＪＵＤＹ：你地知道點解我會對佢乎有感覺啦


阿琪：明白了
我：……
ＪＵＤＹ：話我港女我都要講架拿，女人點都想有個識哄下自己既男人
ＪＵＤＹ：但呢個Ｂ男，哄都唔識哄
我：可能，佢好努力學緊呢
ＪＵＤＹ：學極都學唔到
阿琪：妳未再比多Ｄ時間佢囉
阿琪：但係妳頭先都好絕下無咩比機會佢講野咁
ＪＵＤＹ：你地唔知架拿
ＪＵＤＹ：我同佢之間發生過一件事
ＪＵＤＹ：所以我唔多想理佢
我：咩事？
阿琪：咩事？
ＪＵＤＹ；佢背叛過我同其他女人一齊過
阿琪：竟然


我：……
我：但妳都係啦
ＪＵＤＹ：我知啊
ＪＵＤＹ：不過我都會嬲
ＪＵＤＹ：哈

我同阿琪見到ＪＵＤＹ既ＭＳＧ後，都互望笑左一個心照不宣。

ＪＵＤＹ：遲Ｄ再話你地知我，Ａ男同Ｂ男既野
ＪＵＤＹ：唔同你地講住，Ａ男搵我，遲Ｄ傾

阿琪睇完ＭＳＧ後嘆一嘆氣，「天下間有無一段簡單Ｄ既戀愛。」

我聽到後，答佢：「愛情，從來不簡單，但可能，就係妳旁邊呢。」我用一個好深情既眼神望住阿琪，而阿琪只係笑左笑，「食你既魚飛啦。」



呢粒魚飛，係甜既。