[愛情無限loop] 就係咁，我做左女神一年既備胎: １０２　愛的感覺

成程飯，ＪＵＤＹ咆哮左不下數十次，而我同阿琪，就係眾目睽睽之下食左呢一餐，食完飯，ＪＵＤＹ就係未呻完，捉坐我地唔比走，要我地陪佢唱Ｋ話天光。

阿琪望住ＪＵＤＹ，好似好明白佢既痛苦咁，答應左佢，而ＪＵＤＹ無問我，佢只係講左一句：「阿琪答應，姐係你都得架啦。」

咁佢咁講又岩既。

係Ｋ房入面，ＪＵＤＹ味霸上身咁不停唱，而我同阿琪就係旁邊陪住佢，聽住ＪＵＤＹ唱歌……唔係，應該係嗌歌，都覺得佢好辛苦，佢好似想將身體入面所有既痛苦都嗌晒出黎，但係，咁樣嗌只會令到佢喉嚨痛。

「其實，愛上一個人真係好難。」阿琪無啦啦係我旁邊講左呢一句。



而我就問佢：「好難咩？」佢點一點頭。

「咁就要睇妳係未對果個人一見鐘情拿！！！」估唔到嗌緊歌既ＪＵＤＹ都答到嘴。

「比起一見鐘情，我更相信日久生情。」阿琪話，咦！！！呢兩個愛情老論先前未就係老牛大人提過既！阿琪話更相信日久生情，我機會未好大囉。

我望一望阿琪，而阿琪呢個時候又望一望我，問：「阿牛，你呢？」

我口窒窒答佢：「……日日日日日久生生情情情情情……」



「你做咩事口吃啊！哈！！！！！」ＪＵＤＹ拎住個味其實可以唔駛咁大聲，我地兩個聽到。

「所以，你講愛上一個人好難，係因為你更信日久生情？」我問阿琪。

「唔係，我意思愛上一個人難，係指你要完完全全放下先前果份感情，先可以全心全意投入另一段感情，呢樣野，好難。」阿琪一副感懷地說。

「無錯！妳講得好岩……」個咪無電真係無得及時，ＪＵＤＹ將支咪放左一邊，然後坐左過黎話：「就好似而家既我，我知Ｂ係好愛我，仲同我求婚，但我仍然對Ａ念念不忘，就算同Ｂ一齊都好有可能搵Ａ執返劑，咁樣，我點可以同Ｂ好好開始。」原來已經有分Ａ同Ｂ。

阿琪聽到後點一點頭，「係啊，如果咁樣夾硬開一段新感情，到最後只會不歡而散，本身好可能只有兩個人既傷痛，會變成三個人既傷痛。」



「等等，我唔係好明，點樣兩個人既傷痛變成三個人既傷痛？如果你唔揀另一個，其實另一個都會好唔開心，所以唔係應該一開始都係三個人傷痛咩？」我問。

「牛兄，你唔明，我地兩個講果種痛，唔係你講果種咁簡單，我地講果種，係叫愛過既後遺症，而你講果種，都未愛過，又可來有後遺症。」ＪＵＤＹ答我。

「原來如此，長知識。」我向ＪＵＤＹ點一點頭。

「唉～你點會明。」拿，呢句如果只係ＪＵＤＹ講既話，我無所謂，而家連阿琪都咁，唔通ＪＵＤＹ　Ｄ負能量傳左比佢？

「不如叫杯野飲好唔好啊？」見世色唔多對路，就緊係搵Ｄ野轉移話題啦。

但一叫完野飲，佢地就繼續頭先既話題，「ＪＵＤＹ，妳話如果有粒藥食完可以即刻放低以前既感情，妳話幾好呢？」

「我就覺得，如果有粒藥，可以令到自己即刻鐘意對自己好好果個人，咁我就唔駛咁煩。」ＪＵＤＹ答佢。

而我叫完野飲就坐係度聽佢地講野，問左佢地一句：「幾妳地未試下愛上對你地好既人囉。」



佢地望一望我，然後笑左下，一齊答我：「感情係可以培養，但感覺係無得呃，就算一對再好既男女都好，如果無感覺，根本一齊唔到。」

「咁姐係如果有左果下感覺，就無問題啦？」我問佢地兩個。

「係啊。」佢地答。

「好！」我拎起左一支有電既咪，「我地而家要幫ＪＵＤＹ搵對愛佢果位男人既愛的感覺！！！」