[愛情無限loop] 就係咁，我做左女神一年既備胎: １０１　做備胎的與有備胎的女人

阿富履行佢嘅承諾，佢真係無再煩阿琪，當然又時佢都會忍唔住搵阿琪，但都無以前咁誇張，可以話阿富既事情暫告一段落，只係暫時。

而我同阿琪，好似感情好左，而家事無大少有咩問題都會搵我，有時甚至係街度撞到ＳＡＬＥＳ要搵人解圍，都會ＭＳＧ我打比佢。

仲有果位能蟹仔，佢不停想諗方法幫我，但係ＪＵＤＹ聽完都話佢果Ｄ　ＩＤＥＡ都係最低擋數，強調如果我用唔會ＷＯＲＫ，而我問點解佢咁強調係我用唔會ＷＯＲＫ，佢就話我個朋友能蟹仔係男神級，而我……自己知啦唔駛講咁多……

經過一次比賽之後，阿琪好似著左個制咁，不停咁搵其他跑步比賽，而我當然要陪佢參加啦，跑ＧＲＯＵＰ入面亦不停有好多新ＭＥＭＢＥＲ加入，咁又係既，有咁多獵人係度，就緊係要搵返多Ｄ獵物比佢地先得既。

所以每次例會都會有好多唔同既臉孔，好多少女ＭＥＭＢＥＲ一見到能蟹都好似雙眼發光咁，但我睇到能蟹仔卻有Ｄ討厭，不過ＪＵＤＹ同阿琪成日都話佢係口是心非，口講就話唔鐘意，但實際不之幾咁開心。



講返我地個三人幫先，阿琪成日都叫ＪＵＤＹ跑步，但ＪＵＤＹ永遠都會放飛機，成日都整到阿琪嬲到爆，又幾次仲因為咁佢地兩個嘈左交，我呢個中間人成日夾係佢地兩個中間，真係超慘，不過好彩每次都解決到，因為佢地兩個都係吃貨，所以只要搞一次飯局，佢地兩個都會好返晒。

不過最近，ＪＵＤＹ好似又為左果樣野煩，無錯，就係佢果兩位男性伙伴，聽講有個已經求左兩次婚，但ＪＵＤＹ都無答應到，而ＪＵＤＹ愛果個，好似開始有Ｄ唔對路。

係呢次既三人飯局，ＪＵＤＹ成程都嬲到爆，因為，佢有位朋友ＳＤ左一張相比佢。

「你地兩個睇下！！！」佢將部電話好大力咁掟落張枱度，而我同阿琪就望一望手機入面張相。

係一張一個男人攬住另一個女人既相。



「相入面係條仆街啊！！！個女仔係公司一個新入職既同事啊！！！」ＪＵＤＹ嬲都面超紅，而我同阿琪兩個人對望左一眼後，都唔知講Ｄ咩野好。

「條仆街有無咁撚賤格啊！佢食還食！點解要係公司食啊！仲要比我知道！！！」ＪＵＤＹ既怒火睇黎好難蓋住，佢愈講愈激動，就快將眼前果塊牛排收成免治。

阿琪見到ＪＵＤＹ咁，就係我耳邊講：「不如叫Ｄ啤酒比佢下火好唔好啊？」

「啤酒得咩？」我問佢。

「鬼佬涼茶嘛。」我聽到阿琪咁講後笑左笑。



「仆街！！！所人男人都係賤撚格架！！！！！」佢呢一句，嗌到全場都聽到。

而我見到佢咁，就同佢講左句：「我代表Ｄ賤撚格既男人同妳講聲對唔住。」

「死仔，連你都串９我。」ＪＵＤＹ將個免治牛推到我面前話：「食左佢。」

「阿姐，你知我戒左牛架啦……」ＪＵＤＹ聽到我咁講後，就望一望阿琪，「我都唔食牛架。」

「啊！！！！！」睇黎ＪＵＤＹ真係接受唔到呢個打擊。