[愛情無限loop] 就係咁，我做左女神一年既備胎: ９９　阿富去左邊？

衝過終點既一剎，有一種開心，有一種解放，有一種激動，有一種成功感，但係呢ｄ感受都被疲倦壓住唔可以一下子咁爆發出黎，好多時候，都要係過左終點後一陣先會開心興奮。

阿琪同ｄ　ｇｒｏｕｐ　ｍｅｍｂｅｒ講佢衝線果一刻腦入面諗點既係一陣食ｄ咩好，要食茶記定飲茶好，真係比佢激死。

而我，就望住我手機開左幫我計跑步成積既ａｐｐｓ，見到上面所顯示既時間，再諗返阿富先前ｓｄ比我，佢訓練既時間，嘆左口氣，無錯，雖然一直都用輸硬既心情，但當面對結果時，心中點都會有少少不甘。

但係……點解到而家都未見到阿富既身影既？

Ｇｒｏｕｐ　ｍｅｍｂｅｒ都開始問起我諗到既問題，就話未見人原因可能有兩個，第一係佢衝過左終點，但未搵到我地，第二係佢未衝過終點。



但係阿富係ｇｒｏｕｐ入面成積不嬲有返咁上下，點會未衝過終點，所以我地四圍搵阿富，當然有一ｄ人就係終點繼續等，為免佢真係乎過終點，但係呢個機會真係好微。

我同阿琪兩個人一齊搵，眼見佢一臉既擔心，此時此刻既我無咩特別感覺，因為，我都擔心緊阿富。

搵左好耐都未搵到佢，甚至，大會最慢時間都過埋，最慢果批人都過左終點我地都未見阿富既身影，眾人，就更加擔心。

「打一打比阿富好ｗｏ。」金姐話，然後菜老闆答佢：「頭先打左好幾次，佢電話通左但無人接。」

而我，就傳左個ｍｓｇ比佢，問佢去左邊，但見到佢既最後上線時間，係馬拉松比賽之前……阿富，你究竟去左邊？



係一個擔心既情況下，我地只係去食左少少野就返屋企，我諗阿琪真係好擔心，因為佢平時既食量一定無咁細，頭先既佢，只係食左幾啖就無再食。

返到家，老牛大人好熱烈既歡迎，「阿仔返黎拿！！！」估唔到老牛大人叫左咁多野食返黎，最緊要係，佢叫左好多親朋黎埋。

「搞咩事啊，阿爸……」我望住佢問，然後佢就好興奮咁話：「我個仔第一次跑馬拉松比賽ｗｏ，跑完緊係要大搞啦。」

望住老牛大人仲開心過我，感覺，開心得好實在，不過就難為左ｄ親朋，有ｄ親朋仲要係唔知咩事而搞咁多野，望住佢地不明所以既樣，都幾好笑。

食完野，親朋走晒，老牛大人仲係興奮狀態不停打比佢ｄ朋友話比佢地聽今日我去跑馬拉松既事，我望住呢位老牛大人，咁大細路既行為，從心而發微笑左出黎，可能，每個阿爸只要佢地既仔女做左一少少少少少既事，都會好似佢咁，想向全世界既人講佢地仔女幾咁勁。



而我，就返左入房，訓左係張床上面休息，今日跑步腳有ｄ痛，而且跑得咁駁命，對腳而家好似唔係自己咁，睇黎聽日要去搵鐵打師父睇睇佢先得。

拎起電話，打開ｍｓｇ　ａｐｐｓ，ｓｄ左個ｍｓｇ比阿琪。

我：有無好好休息啊
阿琪：有啊
阿琪：但係訓唔著
我：我都係
阿琪：點解啊？
我：唔知，阿富點
阿琪：我都係因為咁訓唔著

我又再ｓｄ左個ｍｓｇ問阿富，但係佢最後上線時間仲係比賽前，心中既不安愈來愈大。

阿琪：我打左幾次電話佢都唔聽


我：我ｓｄ　ｍｓｇ比佢佢都未覆
阿琪：都唔知佢搞咩
我：而家擔心都無用
我：好好休息
我：聽日我地兩個一齊去搵佢好唔好
阿琪：好
阿琪：咁我去訓先拿
阿琪：真係好眼訓（喊笑）
我：嗯，晚安
阿琪：晚安（開心）

唔知，阿富點解會唔見左人呢？