[愛情無限loop] 就係咁，我做左女神一年既備胎: ９７　起點上！開跑了！

熱完身，我地幾個就去上線，可能我地早左上線既關係，離起點都好近，就係呢個時間，菜老闆就提意，「可如我地影返福相。」然後，佢就拎左部手機出黎，搵左個人幫我地影相。

而呢一張，算係我同阿琪一齊比賽既第一張相。

「好拿！咁多位跑手早晨啊！」比賽既ＭＣ開始用好振奮既語氣講佢既開場白，「今日既天氣真係好適合跑步啊！」雨都就落得出拿，咁都適合跑步你係未傻架，「大家食左早餐未呢？」食左拿唔該，「今日我地好榮幸請到……」下刪數百字因為佢開始介紹今日有咩嘉賓出席，但我地都無理佢，只係掛住望住我地頭頂既航拍機揮手。

我係等緊開跑既時候，不其然留意左阿富一眼，唔知點解，佢今日真係特別靜，而佢都望到我望緊佢，係呢一刻，我只係講左句：「加油。」而佢都點左點頭話：「你都係。」

個ＭＣ終於講完佢Ｄ廢話，去到所有人都最重視既階段，就係倒數，「好拿！黎開跑既時間仲有２０秒！我地一齊倒數！２０……」



點解會係２０開始倒數咁怪既，通常都係由１０開始架。

「１９……」

「我有Ｄ緊張添。」阿琪同我講。

「１８……」

「我都有少少。」我答佢。



「１７……」

「一陣你跑果陣唔好又整親啊。」阿琪叮囑我。

「１６……」

「知道拿。」

「１５……」



「仲有跑唔到就唔好夾硬黎。」

「１４……」

「放心啦，我一定唔會夾硬黎。」

「１３……１２……」

「我地兩個單獨合照一張好唔好啊？」阿琪無啦啦咁問。

「１１……１０……」

我七手八腳咁拎起部手機，阿琪就哄左過黎，我望住鏡頭既我地，笑得好開心。

「９……８……７……」



手機螢幕一下反白，再配上一下扮係快門既聲音。

「６……５……」

我望住我地兩個既合照飛到左下角既格仔入面。

「４……」

「你好似有野未同我講。」阿琪同我講，而我諗左諗，笑左笑。

「３！」

「加油。」我同阿琪講左句加油。



「２！」

「你都要加油。」阿琪回以一個微笑。

「１！」

一聲嗚笛，我第一次比賽係我七手八腳將部手機放返入褲袋既情況下展開，原來Ｄ　ＧＲＯＵＰ　ＭＥＭＢＥＲ　講Ｄ野係真架，當你參加比賽果陣，你既速度就會比平時快左好多，因為，當你身邊既人都跑得咁快既時候，你係唔會有想落後既感覺。

但係我記得金姐叮囑過我，記住比賽，要跟住自己節奏跑，唔好見到人地死衝，你就一齊死衝，所以，我用快我平時既速度，而阿琪都係一樣，用平時既速度跑，跑係我旁邊。

而阿富，已經唔見左人，菜老闆都係，金姐都係。

好多跑手不停係我同阿琪既身後衝上黎，以我目測佢地既時間，可能有成４分半１Ｋ，對於我，呢個速度算係快，所以我無跟上去，我想慢慢加速。

其實頭先個ＭＣ講既野都唔錯得晒，今日無咩太陽，涼涼地，真係幾適宜跑步，如果唔落雨的話。



而且係吐露港跑仲可以睇埋旁邊Ｄ風景，都係唔錯，今次既第一次既起點開跑，我好滿意。