[愛情無限loop] 就係咁，我做左女神一年既備胎: ９６　吐露港

好難得無緊張感訓左成晚，起身果下，感受到前所未有咁充滿動力，自己認為。

起身，一出房門已經見到老牛大人煮好晒早餐，佢望住我話：「快ｄ食多ｄ野，一陣先會有力跑步。」

我望一望成枱既早餐，有一刻既感動，然後又好冷靜咁講：「阿爸，跑之前唔可以食咁多野架。」我拎起左一塊三文治，咬左一啖，「好食。」

老牛大人笑左笑後話：「加油啊，我相信你跑步點都會叻過你追女仔。」

我無奈地望住老牛大人笑左笑。



去到樓下，一早約好左既阿琪已經係度等緊，「咁遲架。」佢話，然後我望一望手機上顯示既時間答佢：「無遲啊。」

「要我等就係遲。」阿琪講笑咁話，然後無啦啦認真咁問：「今日有無信心？」

「有。」我好用力咁點一點頭。

日出後天色好似陰陰地，阿琪望一望個天，問我：「唔知會唔會落雨呢？」

「唔知呢。」我答佢，然後都望一望個天後話：「就算落雨，都要繼續跑，仲要跑係妳前面。」



「點解要係我前面？」阿琪笑住咁問。

「因為要幫妳擋風雨嘛。」我答佢，而阿琪笑得好甜話：「痴線。」

我地兩個先坐地鐵，然後轉車去比賽場地，我第一次既比賽，係大學吐露港既海旁，今日既天氣有ｄ凍，天色就暗暗地，一陣跑緊既時候落雨既機會都好大。

一到步我地兩個就去左ｊｏｉｎ班跑ｇｒｏｕｐ既朋友，阿富當然係其中一個，而今日比賽既人，有菜老闆，有金姐，仲有其他既ｇｒｏｕｐ　ｍｅｍｂｅｒ，而當我地熱緊身果陣，我電話響左一響，係ＪＵＤＹ。

ＪＵＤＹ：加油啊牛兄
我：好難得妳咁早起身ｗｏ


ＪＵＤＹ：係啊，講完我之後就去訓過（喊笑）

我將ＪＵＤＹ既ｍｓｇ比左阿琪睇，佢睇左都笑得好開心。

而阿富，唔知點解佢今日好靜，可能，係想比賽前認真咁諗下一陣點跑，定係，佢見到阿琪剩係同我講野，佢唔開心？

不過，過左今日後，佢應該都會繼續追阿琪，因為我真心覺得，以我而家既成績，係無可能贏到阿富。

「牛兄，隻腳點啊？」菜老闆問我。

「都無咩事，個鐵打師父都話我可以黎跑。」我答佢。

「咁未好囉，但係都要錫住自己啊，你日後仲有大把時間，唔好因為今次而去駛命啊。」佢行左埋黎搭住我膀頭，好細聲咁話：「雖然我會買阿富贏，但都唔想你跑傷架。」

我聽到佢咁講後，驚訝咁望住佢問：「點解你知既？」



「係阿富講既，不過你放心啦，呢件事得幾個人知架咋。」佢答我。

得幾個人！？姐係仲有其他人知啦！？而且你知道的話，仲係未得幾個人知咁少啊……