[愛情無限loop] 就係咁，我做左女神一年既備胎: ９４　擁抱過後

實在太沉醉係阿琪既懷抱入面，沉醉到，原來已經抱左成分鐘都唔止。

「你係未訓左啊？」阿琪好溫柔咁講，而我就成個人即刻彈起企返直，當然又整到隻腳叫痛啦。

阿琪咪起隻眼望住我，然後話：「你抽我水。」

「無啊！我無啊！」我聽到佢咁講第一時間既反應係咁。

「你食我豆腐。」阿琪繼續咪起隻眼望住我。



「唔係架！我真係唔係有心架！」死啦，頭先我咁樣阿琪會唔會而為我同班狗公一樣架。

「你博我懵。」阿琪又講，唔知點解我心中既罪惡感不停放大，唔通，我真係好似阿琪咁講，其實我係抽佢水，食佢豆腐，博佢懵！？

佢拍左我個頭一下，呢一下，拍返醒混亂緊既我，「講下笑咋我。」佢話：「雖然你都似係想食我豆腐架拿，但見係你……」佢笑左笑，然後就傳身走左，走果陣仲話：「記得搽腳啊，快Ｄ好返先可以阿我行街架。」

下？姐係點啊？咩叫做見係我……然後呢，點解阿琪唔講埋落去啊。

我拎住支鐵打酒上返樓，補充，係好痛苦地上返樓，但係，唔知點解，我笑得好開心。



「死仔，返黎拿。」老牛大人係門口迎接我，「係啊，我返黎拿。」

我回應佢後，佢就話：「做咩落完去之後就咀角含春笑得咁淫啊。」

「邊有ＷＯ。」又係果種打從心底笑出黎既笑容，我將支鐵打酒放好左之後，坐返上張床上面，望一望電話，原來阿琪ＳＤ左ＭＳＧ比我。

阿琪：以後你有咩事唔話我知
阿琪：你就知死
我：知道拿
阿琪：你好好休息下拿


阿琪：我自己去跑步
我：妳小心Ｄ啊
阿琪：知拿
阿琪：我一定唔會整親腳先（喊笑）

係呢一刻，我暫時將同阿富既打賭忘記，不過，都只係暫時……因為過左幾日，我收到阿富ＳＤ比我既一張相，相上面係佢比賽前訓練既最佳時間……３８分５３秒……