[愛情無限loop] 就係咁，我做左女神一年既備胎: ９３　醫療聖藥

可見我無心情到連阿琪既ＭＳＧ都唔想回，就真係好無心情，就當我想訓左佢算之際，電話響起，來電顯示，係阿琪。

「喂？」最後我都係接左電話。

「點解你整親唔同我講啊？」阿琪話，但我唔知點答佢。

「仲咩唔講野啊，又話咩都會話比我知，但而家你傷到咁都唔講我知，我好擔心架知唔知道啊。」聽佢語氣，唔知佢係嬲緊定唔開心。

「我……」唔知講咩好既我，最後講左呢句：「同阿富既比賽一定輸。」



「仲比賽！隻腳傷成咁啊！有無去睇醫生啊！」今次好明顯地佢真係嬲嬲地。

「有啊，睇左鐵打。」我答佢。

「咁鐵打師父點講啊？」佢問。

「佢叫我呢排唔好再跑，等好返先ＷＯ。」我答佢。

「咁你要聽話唔好跑啊，你係好嚴重？行唔到？」佢問我。



「如果要行既話都行到Ｄ既。」我答佢。

「咁你一陣去樓下等我，我拎Ｄ野比你。」阿琪講完之後就收左線。

我望住部電話莫名其妙，行左落床，好辛苦先行到去門口……「你個衰仔去邊啊？」老牛大人問。

「無啊，想係樓下床陣姐。」我答佢，然後就繼續好努力咁行出去。

去到樓下，我坐左係附近既欄杆上面等阿琪，究竟，佢無啦啦叫我落樓下等佢做咩事呢？



等左陣，見到遠處阿琪既身影，就咁好遠都望到，阿琪一臉既擔心，再帶一Ｄ嬲嬲地咁行過黎，「咁嚴重既！」

「其實……都未斷腳，唔算嚴重啊。」我笑住答佢，但好快我就笑唔出，因為我眼前既阿琪嬲到面都紅晒，「仲講笑！好好玩啊而家！」

見到阿琪咁嬲，我都唔敢出聲，而係呢個時候，阿琪將一支鐵打酒拎比我，「我屋企人整親都係用呢種鐵打酒架，好好用，記住早晚自己搽下啊。」

「知道。」我接過左支鐵打酒，個心好甜。

「走拿我。」下！？咁快走？我本身諗住隻腳傷左布排都唔可以同阿琪行街，而家佢出現可以見佢，點都要把握多Ｄ時間先得，「阿琪……我……」正當我想追上去之際，我唔醒起自己隻腳整親，一大力少少落地，痛到我叫左出黎。

阿琪聽到我叫聲，轉個身望一望我，而我就有少少企唔穩，跌向左阿琪果度。

「你小心Ｄ啦，整親隻腳就。」我無記錯佢應該講左句咁既說話，因為，呢一刻，係我眼中既世界好似停頓左咁，我感覺到阿琪雙手環抱住我條腰，背部感受到佢掌心傳黎既熱，膀頭想有一處從上而向下壓既力，係阿琪既下巴扣住左我膀頭。

而我……就不其然咁將手放左係阿琪條腰上面。



呢個突如其來既擁抱，係上天送比我最好既醫療聖藥。