[愛情無限loop] 就係咁，我做左女神一年既備胎: ９２　嚴重左！

痛住咁訓，希望第日無事啦，但我呢個諗法真係天真……

第二日起身果陣，我隻腳仲腫過尋晚，都唔知係未老牛大人幫我搽完之後仲傷。

但係點腫都好，我都要落床……嘩！唔店！好撚痛！而家係連落一落地都好似有觸電既感覺，好彩今日係假期姐，如果唔係我一定返唔到工。

我望住腫到似豬啼既腳，然後大叫：「阿爸，可唔可以過黎扶一扶我啊？」

老牛大人聽到，第一時間都係果句：「作死你啊，嘈醒你娘親啊……嘩！你隻腳搞咩黎啊！？」佢行左過黎扶我起身，「你發夢玩腳交啊？」



我已經無佢咁好氣，「阿爸，可唔可以扶我落樓睇鐵打？」

「好。」老牛大人扶住我行到鐵打師父果度，而果位師父一見到我隻腳咁，就問：「哥仔，你搞咩整到隻腳咁啊？」

「腳交囉。」老牛大人，你係呢個時候可唔可以講笑呢？只不過，我望住佢個樣覺得佢係好認真咁講……

「唔係啊，我係跑步整到咁。」我答。

「跑步都可以整到咁，你點跑架，無可能會跑到咁架ｗｏ。」位師父一路教訓我一路幫我睇隻腳。



「可能因為就快比賽，所以呢排練密左掛。」我答佢。

「咩野比賽黎架，跑山啊？」佢笑住問。

「唔係，跑馬拉松姐。」我答佢，但估唔到係換黎兩個驚訝：「你跑馬拉松？」師父同老牛大人都好驚奇咁問我。

「咁幾時比賽啊？」師父問我。

「仲有兩個星期多ｄ……」我答佢。



師父聽到後就搖一搖頭話：「我就勸你呢兩星期唔好跑好拿，你而家既情況，似係傷左筋膜，要慢慢休息先得，唔好再四圍行。」

「下！唔得啊，今次個比賽我練左好耐，而且最後兩星期，唔可以停架。」我同師父講，但師父就好語重心長咁話：「咁你想以後都跑得，定剩係跑完呢一次？」

我有無傷得咁嚴重啊！！！

阿爸聽到師父咁講後，就答：「佢緊係想以後都跑得啦。」

咁老牛大人講既野都岩既，所以我只可以好失望咁答：「好啦……」

「我幫你敷ｄ藥啦，會快ｄ好，不過你呢排真係唔好再去跑拿知唔知啊。」師父一再叮嚀。

「係……」我答。

敷好藥，老牛大人就扶我返屋企。



「好好坐係床度唔好四圍郁。」老牛大人命令我，我只可以答：「係……」

半訓半坐係床上面，我望住包住既腳，心中百感交集，唔通今次我同阿富既打賭就咁完左？唔通我就唔可以用自己既能力幫阿琪令到阿富唔好再煩佢？

就係呢個時候，阿琪ｓｄ　左個ｍｓｇ比我。

阿琪：陪我去跑步
我：可能
我：今日唔得
阿琪：點解啊？

我ｓｄ左我包住腳既相比阿琪睇，然後佢就問我。

阿琪：點解會整親既？


阿琪：有無事啊？

而我而家呢一刻，無咩心情答佢……