[愛情無限loop] 就係咁，我做左女神一年既備胎: ９１　鐘意與愛

今晚全程都好似係相安無事下渡過，無錯阿富都係不停煩阿琪，但呢Ｄ已經係意料中事，同埋好多我都化解到，所以不成問題。

但係到我真係以為相安無事之際，一陣既隱隱作痛，好似提醒我小心Ｄ。

呢一個痛楚，係來自的右腳腳板內則，足弓位置，好似大力咁踏一踏地，就有一種觸電既感覺……唔通，係因為我呢排練得太多既關係？

我企一企係原地，慢慢咁拉一拉筋，又似無咩事ＷＯ。

「阿牛你做咩啊？」阿琪行左過黎問。



「無野啊。」我答。

「真係？」阿琪好似有Ｄ擔心。

「真係無野啊。」我跳左幾跳比佢地，「係未啊，仲跳得添。」

「無事就好啦，但有事你一定要話我知啊。」阿琪話。

「知道拿。」我答佢。



見到妳咁樣都擔心成咁，唔通我話妳知頭先我跳果陣又有果陣觸電咁痛既感覺咩？

慢慢行返屋企後，我除左隻鞋睇一睇我隻腳，見到右腳同左腳已經有好大既對比，我腦中第一時間諗既野，唔係要點樣醫好隻腳，而係同阿富既打賭。

點解？點解要係咁重要既關頭先會傷左隻腳。

「今日又會咁早返既，你個……」老牛大人既聲係後面傳出：「死仔！做咩搞到隻腳咁？」

死火，比老牛大人知道左。



佢行到我既面前，望一望我隻腳後再望住我問：「玩腳交玩到腳整親啊？」

「老牛大人！點會玩腳交玩到隻腳腫成咁啊！要玩幾多次先會有咁既效果啊！你答我！仲有啊！如果真係腳交都係個女仔腳腫啦！點會係我啊！」真係谷鬼氣。

「點撚知你個死仔會唔會中途轉基架！」老牛大人竟然好理直氣壯咁話：「仲有！作死你啊！咁大聲！嘈醒你娘親啊！」佢一巴打左過黎。

「阿爸，我已經傷左腳，唔想傷埋個頭。」我話。

「死仔！坐好！」佢喝住我話。

「又叫我唔好咁大聲，自己又咁大聲。」我話，然後見到佢拎左支鐵打酒過黎，坐係我面前講：「伸隻腳出黎啦。」

好耐都無咁樣比老牛大人搽鐵打酒，「好痛啊……細力Ｄ好唔好啊……」我咬緊牙根咁話。

「唔大力點搽得散Ｄ瘀血啊。」佢愈講愈大力。



「阿爸，有Ｄ野想問你。」我話。

「問啦。」佢答。

「其實你果陣時咁樣等阿媽，阿媽會唔會覺得煩架……好痛啊！！！」我問完後都唔知阿爸係未特登咁大力。

只見阿爸笑左笑後答我：「我咁有技巧，你娘親點會覺得煩。」

「點有技巧法？」我問佢，而佢問返我轉頭：「你明唔明鐘意一個人同愛一個人既分別係邊到？」

我諗左諗答佢：「唔係都係一樣架咩？」呢個其實似問題多個答案。

「真係蠢，緊係有唔同啦。」老牛大人愈講愈起勁，當然搽我隻腳既力度都一直加大，而我就係痛楚下繼續聽佢講野：「你鐘意一個人，你會想擁有佢，唔會想比人店佢，唔會想比佢同其他飲有溝通，變成霸道，變成專橫，最後，令人煩厭。但愛就唔同，你係會付出，但係只會付出佢所需要既野，你會呵喚佢，但係會比自由佢，因為只要佢開心，你就無問題，你會陪住佢，係佢身邊，但係佢唔會覺我煩，慢慢地，佢就要變成需要你，唔見你佢會唔舒服。」



「好痛啊！！！！！」堅係好痛。

「鐘意好易變成令人煩厭，但愛會慢慢使一個人感動。」老牛大人搽完後就收好支鐵打酒，「你要明白呢個道理啊，牛仔。」

老牛大人講既野，就好似我同阿富咁，我好慶幸自己識得做後者既野，但又可憐阿富，佢做左前者既野。

「但其實……」我問老牛大人：「如果你鐘意果個人都鐘意你，未唔會有你頭先講既野發生囉？」

老牛大人聽到後笑左一笑話：「睇你牛仔呢排醒左Ｄ。」行到我身邊，摸一摸我個頭又話：「如果，呢個世界上所有既愛情，都係咁簡單就好。」

「阿爸。」我認真咁望住我阿爸問：「頭先你搽完我隻腳洗左手未？」

佢理直氣壯答我：「未。」
「阿爸！」你唔係掛，未洗手就摸我個頭。



「都話你娘親訓左唔好嘈醒佢啊！」佢又一巴打左落黎。