[愛情無限loop] 就係咁，我做左女神一年既備胎: ９０　軍師？

四人跑團既路線好簡單，加埋有８Ｋ，一般既訓練跑，今日我有老朋友係度，我就提議唔好跑咁快，因為未知我呢位朋友跑唔跑到。

但係能蟹就話佢無問題，叫我地照平時咁跑就得，佢咁講就咁啦，所以我就照返平時既速度跑。

阿富一貫既作風，唔駛我多講，就緊係不停跑係阿琪旁邊，阿琪有見及此，就陪我並排跑，仲同阿富講：「如果你可以跑快Ｄ唔駛就住我同阿牛架，而家我地兩個跑既速度都唔係你平時既速度，你跑先啦，有阿牛陪我就得架拿。」

但阿富聽到後就咁答佢：「我今日想慢慢跑休息下。」

其實，阿富自己都察覺到阿琪已經對佢有反感啦，點解仲要不停做Ｄ令阿琪反感既野呢？



能蟹係旁邊望住覺得好奇，就細細聲問我：「呢個男既都……」佢無問完我已經點左頭。

「不過唔怕啦，個女仔都好似唔想ＳＨＯＷ佢咁。」能蟹話。

都係既，但係每次見到阿琪忍住嬲既樣，都有少少替佢擔心，不過，又有少少開心，呢種感覺真係好奇妙。

成程跑步都好相安無事，就算阿富不停係阿琪旁邊講野，阿琪都唔多想理佢。

到今次例會既尾升，我地一齊去附近既大排檔食野，坐位方面就好似我先前講過既一樣，阿富係都要坐係阿富既旁邊，而我就同能蟹坐係阿琪既對面。



「硬頸牛，點解你唔同你條女坐啊？」佢問。

「痴線，佢都唔係我條女。」我答佢。

「咩唔係姐，好快係架啦你地。」佢陰陰嘴笑左笑後，又話：「但係你都唔駛大方都咁ＷＯ，溝女，要爭架。」

「聽你咁講，你好似好有經驗ＷＯ。」我講笑咁話。

「緊係，我出左名界女無數，我有個朵架，叫做界刀殺手。」佢ＣＨＯＫ晒樣話。



「殺手咁勁啊，拉你去差館好定青山好？」我答。

「未講笑啦，見係你我過兩招比你，對付呢Ｄ咁多人追既女仔，你要做到欲情故縱。」佢好認真咁話。

「咩叫做欲情故縱？」我不解地問。

「就姐係叫熱情一下，又冷淡一下，做到唔係好緊，但又好似好緊。」點解佢答完我好似無聽過野咁既，「姐係點啊？」

「講到咁你都唔明，咁你真係要學下野。」佢搭住我膀頭，然後話：「以後，我做你軍師幫你，點睇？」

下……我呢隻牛雖然蠢蠢地，但又未知於連呢Ｄ野都要人地幫既，「唔駛拿能蟹仔，多謝你既好意。」

「客咩氣啊硬頸牛，就咁話啦。」等等，我頭先好似係拒絕你ＷＯ，你果句就咁話係咩意思先。

呢餐飯都係好相安無事下食完，除左阿琪佢無咩點食之外。



「喂，硬頸牛，我剛剛計過。」佢拍一拍我，而我問佢：「計過Ｄ咩？」

「阿琪望左你成４０幾次，一餐飯望你４０幾次，你機會好大。」佢好似諸葛孔明上身咁話。

我聽到佢咁講，只係應酬地笑左笑，能蟹仔，你放過我啦。