[愛情無限loop] 就係咁，我做左女神一年既備胎: ８６　我只想認真咁跑步

我諗，阿琪真係嬲左我，因為呢幾日我ＳＤ　ＭＳＧ比佢佢都無咩點應我，同佢一齊出黎行街，佢都好似唔想同我講野咁，我問佢嬲咩，佢又唔答我，又話我自己做錯野自己唔知咩？

如果真係做錯，我諗係因為我同阿富打賭既事。

我將件事講左比ＪＵＤＹ知，ＪＵＤＹ一聽到我所講後，就話：「你個死蠢比人設左計都唔知！」

「下？有咩？」我問。

「好明顯有啦，阿富好明顯係特登話比阿琪知，等佢覺得你無啦啦點解要搞其他事出黎煩，所以未嬲你囉。」ＪＵＤＹ答我。



「但係，同阿富打賭係阿富既主意，點解要嬲埋我？」我又問。

「牛兄你真係好死蠢，呢Ｄ唔關係未邊個既主意，係關點解你要同阿富一齊癲啊，本來阿琪以為你同阿富唔係同一類人，但而家無啦，佢一定係以為你同阿富一樣。」ＪＵＤＹ用一個無咁好氣既語氣講。

「我都係因為阿富話如果佢輸左，就以後唔會再煩阿琪，我先咁做咋，但無諗到阿琪佢會嬲我。」我好後悔咁話。

「等等先，阿琪知唔知你係為左咁做？」ＪＵＤＹ問。

「應該唔知。」我答。



「點解你唔話佢知，可能你話左佢知會好Ｄ。」ＪＵＤＹ話。

「佢而家嬲我，我唔敢煩佢。」我答。

ＪＵＤＹ聽到我咁講後笑左出黎話：「你都未同阿琪一齊就已經咁驚佢。」

「咩啊……」我無奈咁望住佢講。

ＪＵＤＹ突然間靜左一靜，然後話：「咁你想唔想話比阿琪聽你係為左佢先咁做？」



我諗左諗，然後搖搖頭，「都係唔好，而家都唔知話左佢知會唔會仲嬲我，都係咩都唔做好Ｄ。」

ＪＵＤＹ聽到我咁講後，嘆一嘆氣，「牛兄，你咁樣就算同阿琪一齊左，都只會係比佢欺負啊。」

「如果可以既話，我無所謂。」我好理所當然咁講，而ＪＵＤＹ聽到報向我反左反白眼。

係一路擔心阿琪嬲我既狀態下練跑，講真，事倍功半，阿琪又唔係完全唔理我，只不過，我明顯地覺得佢一直耿耿於懷點解我要同阿富打賭件事。

「阿琪……」今日照平常咁同阿琪一齊行超級市場，「我呢？」

「拎果件打比我。」佢指左一包意粉後同我講，而我就……「……係。」好微臣咁拎左去比佢。

「最近練跑練成點啊？」佢問我。

「……麻麻地咋。」我答。



「練得麻麻地仲學人同人比賽。」佢話：「要朋人比賽唔該認真Ｄ啦。」佢望一望我。

「知道……」我答佢。

「聽日同你一齊去練。」阿琪講……咦？我係未聽錯，我望一望佢問：「妳頭先講咩？」

「我剩係講一次，如果聽唔到就算。」「唔係啊，聽到架，聽日妳同我去跑嘛。」唔知點解，嘴角不其然咁向上揚。

「妳……唔嬲我拿？」我問，我鼓起好大勇氣問佢。

「係ＷＯ，我好似仲嬲緊架ＷＯ。」佢睥一睥我話：「咁都係唔同你去跑……」「唔好啦！」我無等佢講完話講。

「總之你同阿富想點我唔理，我只係想認認真真普普通通咁跑步，知道未？」阿琪認真咁同我講。



「知道。」我答佢：「其實，阿琪，我同阿富佢……」正當我想講點解我同阿富要打賭既事時，我諗左諗，其實講比阿琪聽，會點呢？我又怕佢會再嬲返我，而且阿琪一聽到我講阿富，佢又睥一睥我問：「阿富Ｄ咩野？」

見到咁，都係唔好同佢講好Ｄ，「……都係無野拿。」