[愛情無限loop] 就係咁，我做左女神一年既備胎: ８５　女神的怒氣

決定左同阿富打賭後，大家都無咩話題，埋單果陣，佢問左我一句：「牛兄，點解你可以咁大方，知道我都知阿琪但又無憎我既？」

我聽到後，問返佢：「我點解要憎你？」

「我都追阿琪，姐係我係你敵人囉。」阿富話。

我聽到後剩係笑左笑，然後講：「阿琪而家唔屬於任何人，而且，我同阿琪係朋友身份，我有咩資格為左追佢而憎另外Ｄ人？」

「但係要追阿琪，就要有一定追到佢既決心。」阿富答返我，但我聽到呢個徊案，只係笑左一笑，然後反問返佢：「照你咁講，姐係你有憎過我？」



阿富聽到我咁問，佢無聲出。

食完野，我就同阿富分開行，我開始明白點解阿琪會對阿富有少少反感，因為阿富既熱情同主動，令阿琪受唔住。

其實頭先一直食野果陣，我手機都不停震緊，我睇一睇，原來係阿琪既ＭＳＧ。

阿琪：我返到屋企拿
阿琪：你同阿富一齊緊？
阿琪：食緊野？
阿琪：返到未啊？


阿琪：做咩唔理人（喊）

見到咁，我緊係即刻覆阿琪啦，但當我打左幾隻字後，就見到「輸入中…」，唔知阿琪又想ＳＤ　Ｄ咩比我呢？

但係……估唔到……

阿琪：阿富話要同你比賽，而且你應承左佢
阿琪：係未真啊？

咩話！？阿富講左佢同我打賭既事佢知？唔係掛。



阿琪：你仲咩要咁做？

阿琪呢個ＭＳＧ，我真係唔知點答，我望住部手機，打左好幾次都唔知ＳＤ唔ＳＤ出去好。

阿琪：唔駛諗咁多，照直講就得
我：係佢話要同我比賽
阿琪：但係你點解要應承佢啊
我：佢講到好想咁

打完呢句後，阿琪就無再覆我ＭＳＧ。

點解？點解阿富要話比阿琪聽我同佢打賭既事？我即刻ＳＤ左個ＭＳＧ比佢。

我：你同阿琪講左你同我打賭既事？


阿富：係
我：點解你要咁做
阿富：佢ＳＤ　ＭＳＧ問你？
我：係
我：點解你要咁做
阿富：點解佢ＳＤ　ＭＳＧ比你問，都唔問我

頂！阿富而家根本將件事聚焦左係阿琪唔應佢上面，佢唔應你我點鬼知啊，我而家剩係想知道點解你要話我地打賭既事佢知咋。

我：阿富，其實我地打賭既事，唔駛比阿琪知，但點解你要咁做

我ＳＤ左呢一句後，等左好耐佢都我覆，佢係未特登咁做架究竟，而我再開阿琪個ＣＨＡＴ，見到佢仲無覆我，唔通，阿琪嬲左我！？