[愛情無限loop] 就係咁，我做左女神一年既備胎: ７５　酒逢知己千杯少

唉……阿琪話有事唔黎得……

「喂，牛兄，呢間好唔好啊？」ＪＵＤＹ問。

唔知阿琪而家點呢……

「牛兄，你比下意見好唔好啊？」ＪＵＤＹ又問。

究竟我好唔好打比阿琪問佢而家點呢？



「牛兄！」係ＪＵＤＹ呢一聲怒吼後，我成個人係行屍走肉既狀態醒一醒。

「係……咩事？」我問佢。

而佢就拎起我半邊衫袖話：「如果你再成個人呆下呆下既話，我就打撚到你仆街先再去飲野。」

我們住佢兇狠既眼神不停咁點頭。

「係要老娘發火你先識醒目既。」ＪＵＤＹ唔好氣咁話：「呢間啊，好唔好啊？」佢指一指身邊果間酒吧。



「好……」係呢個時刻，我仲有我話唔好咩。

入到去，我地叫左支白酒，然後我就繼續垂頭喪氣咁坐左係度……

「都叫你唔好成個喪屍咁款啊。」ＪＵＤＹ望住我係度鬧，而我就用一個可憐既樣望住佢，「而家未同阿琪一齊就已經咁樣，你同左佢一齊後就得了既。」

我聽到呢句後都好認同地搖一搖頭。

酒到，我都有盡男人既風度幫ＪＵＤＹ倒酒，而我一邊倒酒，ＪＵＤＹ就一邊話：「本來今日我出黎係想呻我既野，但而家見到你個死款都唔知同唔同你講好。」



我望一望佢話：「講啦，分散下我Ｄ注意力都好。」

ＪＵＤＹ拎起左杯白酒飲左啖，然後話：「鐘意我果個男人，尋日向我求婚。」

「下！？」我聽到之後真係成個人跳左出喪屍ＭＯＤＥ，「咁真係恭喜晒ＷＯ。」我呢句係真心祝福佢，因為上次先聽完佢話係兩個男人之間糾纏。

但ＪＵＤＹ佢苦笑左一下，又話：「但係尋晚，我去左同我鐘意果個男人屋企到搞野。」

「下！？」ＪＵＤＹ既說話令到我一時唔識反應，「咁……」

ＪＵＤＹ好快就將佢手上果杯白酒飲晒，「我都唔知，我唔討厭鐘意我果個男人，但我就未可以忘記到我鐘意既男人，我而家，可以點做？」ＪＵＤＹ望住眼前既酒杯，手指係杯邊上不停遊走，一臉既猶豫不決，ＪＵＤＹ再度苦笑起黎。

「但係，妳唔可以嘗試鐘意愛妳果個男人咩？」我問佢。

而ＪＵＤＹ輕描淡寫咁話：「我無話唔鐘意，只不過，我無法放低我愛果個，又點樣容納另一個人。」



「咁……未放低左一個先囉。」我又話。

「但話難唔難，話易唔易架。」ＪＵＤＹ嘆左口氣，而我附和咁話：「咁我都知，但妳覺得差Ｄ咩先可以放低妳而家愛果個人，而全心全意去愛果位愛妳既男人？」

ＪＵＤＹ諗左諗後，好認真咁答我：「感覺。」

呢兩個字咁兩個字咁熟既？好似有次同老牛大人傾計果陣，佢都有提過，「係對愛妳果個人既感覺？」

ＪＵＤＹ首先點左點頭，然後又搖一搖頭話：「應該係話，要我對我愛果個男人無感覺後，我先可以對愛我既男人有感覺。」

我聽完佢講既野後，衝口而出左三個字，「好複雜。」

「愛情從來都唔係一件簡單既事。」ＪＵＤＹ語重心長咁講：「好多人都會話初戀係最刻骨銘心，就係因為佢由簡單開始，兩個人享受住單純既快樂，但當二人失去，接落黎既愛情就會變得複雜，因為，已經嘗過愛帶比自己既甜蜜，又經歷過愛帶比自己既痛苦，會變得好保護自己，就算當有一份真正既愛來臨，都會懷疑而變得不真實。」



我從新倒滿佢既酒杯，佢望住漸漸升高既酒話：「唔知幾時，我對愛我既人既感覺，會遠遠大過我愛果個男人呢？」

酒滿，佢拎起左細呷一口，今晚我對眼前既ＪＵＤＹ，加深左認識。

酒過三巡，我地都互相傾左好多自己既事，ＪＵＤＹ佢同呢兩個男人既相識，我同我既前度既事，大家既初戀等等。

已經唔記得左叫左幾多支酒，只知道今日唔知點解兩個人既酒量都好勁，好似飲極都無咩醉意，可能，呢Ｄ就係叫酒逢知己千杯少。

但就係傾到最興高采烈之際，ＪＵＤＹ向一個方向望過去，佢露出左一個驚訝既表情，然後同我講：「牛兄，你睇下果邊果個人係未呂晨？」

聽到佢咁講之後，我就擰左個頭去望，見到既，唔單只係呂晨……呂晨而家同緊一班人飲緊野，而佢攬住左一個男人，我好記得，果個男人就係果日我係佢間房見到，相入面同佢好親密既人，而果個男人雖然比佢攬住左，但係佢隻手就係枱底下面摸緊另一個女人既大脾。