[愛情無限loop] 就係咁，我做左女神一年既備胎: ７４　行屍走肉

阿琪話想飲野，我緊係第一時間行動啦，不過，靈機一觸，搵ＪＵＤＹ傾傾先。

送左阿琪返屋企後，我即刻打比ＪＵＤＹ，同佢講左大既後，ＪＵＤＹ就話：「你都同阿琪出街出得幾密架ＷＯ。」

「都係架，唔好講呢Ｄ住，我正經先，星期五去飲野，妳可唔可以扮話去先，之後到果Ｄ就話唔得閒去唔到啊？」

ＪＵＤＹ聽到我既方法後，笑左出聲話：「牛兄，你都幾古惑架ＷＯ。」就算隔住個電話，都聽得出ＪＵＤＹ而家個笑容有幾衰。

「咁……我都係想制造多Ｄ我同阿琪單獨既機會姐。」我答佢。



「你仲唔夠多啊。」佢笑住話。

「咁妳幫唔幫手先？」我問。

「你問到我實幫架。」ＪＵＤＹ話。

好，搞店左ＪＵＤＹ呢邊，咁我就可以係我地三個既ＧＲＯＵＰ到約拿，真係諗起到開心，唔知旁邊既人望到我咁，會唔會覺得有個痴線佬係度對住部電話笑呢？不過而家好多人都係咁架啦，應該唔會覺得我係痴線佬既。

好快，就到左飲野果日，我一起身就已經滿心期待我同阿琪今晚既約會，而一大早，我就見到我地三個人既ＧＲＯＵＰ度有個ＭＳＧ，唔通係ＪＵＤＹ話去唔到既ＭＳＧ？



我即刻入個ＧＲＯＵＰ度睇，見到既係一個話今晚去唔到既ＭＳＧ，但係，唔係ＪＵＤＹ　ＳＤ出黎，而係阿琪。

我望住一字一句，簡直係晴天霹靂，點解！！！點解今日本來天朗氣清架！無啦啦又多左咁多污雲既！？還返個晴天比我啊！！！

而就係呢個時候，我收到阿琪既ＭＳＧ。

阿琪：對唔住
阿琪：今晚有Ｄ事一定要做，所以黎唔到
我：唔緊要啦
我：仲有下次架嘛


阿琪：幫我同ＪＵＤＹ講聲對唔住
我：知拿

成個人頹晒既我，就好似行屍走肉咁係街上面行……

「先生，你電話響啊。」

點解……點解本來可以同阿琪兩個人一齊去飲野，無啦啦都會無左架。

「先生，你電話啊！」

但係，佢話有Ｄ事一定要今晚做，係Ｄ咩呢？

「先生！」「係！」嘩，嚇得我啊。



「你部電話響左好耐拿。」有個中女對住我講。

「……哦，唔該。」我接左電話，一把聲即刻傳出黎，「喂，點算啊，估唔到佢話唔去先。」呢把聲係ＪＵＤＹ。

「我都唔知啊。」我答。

「咁如果今晚阿琪唔去，我地兩個去好唔好啊，我呢排都想飲野。」ＪＵＤＹ話。

「好啊。」阿琪都無去，去唔去都無所謂既，ＪＵＤＹ話想去，咁就去囉。

「咁今晚放工再打比你啦。」ＪＵＤＹ講完之後就ＣＵＴ左線。

而我，就繼續我今日既行屍走肉。