[愛情無限loop] 就係咁，我做左女神一年既備胎: ７１ 幫到手我一定幫
食完個ＬＵＮＣＨ，我地係間餐廳度繼續坐，「妳真係覺得果間屋唔係呂晨屋企？」我問ＪＵＤＹ。
而佢點左點頭。
「但點解佢要咁做呢？」我又問。
「我點會知，佢份人咩都做得出既，你又估唔估到佢尋晚差Ｄ食左你？」ＪＵＤＹ反問返我。
「咁又係……」我答佢，然後又問：「咁我好唔好話比其他人聽佢既所作所為？」
ＪＵＤＹ諗左諗，然後話：「如果你係女仔，佢係男仔既話，我會叫你講，但而家你係男仔而佢係女仔，我會叫你唔好講。」
「點解啊？」我問。
「因為呢Ｄ行為，永遠對男方係唔公平，就好似你成日係報紙度只會見到男人非禮女人既新聞，而好少會見到一單係女人非禮男人既新聞，就算有，好多人會當成笑話咁睇同討論，但當果單新聞係男人非禮女人，你試係拎黎講笑，就會比人打同鬧到仆街。」ＪＵＤＹ解釋完一輪後，我只可以無奈咁點一點頭。
「無錯，你地Ｄ男人聽完可能會覺得有Ｄ唔公平，但世事就係咁，因為係呢一方面，女人大多數係被害果個，所以比較多人同情。」佢又講，而我答佢：「……咁我都好認同妳既講法，而且有時我都會覺我非禮女人果Ｄ男人係仆街。」
「無錯，所以如果你同其他人講呂晨尋晚對你所做既野，當然聽果Ｄ人會好嬲又或者以後唔會理呂晨，但係就唔會比人公審，但有可能呂晨話係你對佢做出果Ｄ行為，屈你惡人先告狀果陣，你就會比人掛左個色魔既牌，會比人公審，唾罵，所以，我覺得你唔好講比較好。」ＪＵＤＹ講完後望一望部電話，「我睇一睇而家ＧＲＯＵＰ入面，佢想講既野，都同平時一樣，我諗佢都無意思想將件事同其他人講。」
「所以……就咁算？」我問。
「點可以？」ＪＵＤＹ話：「唔講還唔講，但件事唔可以就咁算。」
「咁……可以點做？」我又問。
「比我諗諗先，但而家最好咩都唔好做。」ＪＵＤＹ話，然後我就點左點頭。
現場靜左一陣，再講野既係ＪＵＤＹ：「好，知道你尋晚既事同有左結論後，有另一件事想話你知。」
我聽到ＪＵＤＹ咁講後問：「咩事？」
「你要小心阿富。」ＪＵＤＹ語重心長咁講：「雖然我先前已經有同你講過要小心佢，但係今次，我真心咁講。」
我望住佢苦笑左一下，「我都知，尋晚阿琪有ＭＳＧ我話阿富送佢返屋企……」「牛兄，唔係咁簡單架。」
我望住ＪＵＤＹ用一個不解既眼神話。
「係你走左之後，阿富成個人不知開心左幾多，而且即刻當晒自己係阿琪既男朋友咁款，不停係阿琪身邊遊走，又要幫佢燒野食，又要幫佢拎飲品，實情想做個廿四孝男朋友，果班女ＦＡＮＳ仲ＯＮ９，佢地竟然幫阿富助攻，話：『阿琪妳就好啦，阿富對妳咁好，如果我係妳就好拿。』，成晚阿琪不停向我求救，我就不停擋阿富同佢地班ＦＡＮＳ既攻勢，辛苦到我。」ＪＵＤＹ一路講一路露出一個苦不勘言既表情。
「辛苦晒妳。」唔知點解我衷心咁講呢句。
「傻啦，我同阿琪都係朋友，我睇得出阿琪好唔想阿富咁做，而且更加知你想追阿琪，我緊係幫手啦。」ＪＵＤＹ講完呢句後就繼續講尋晚既事，「到燒完野食大家諗住返去既時候，阿富就死都要送阿琪返去，阿琪已經拒絕左好幾次，最後就有少少火火地，但係阿富好似唔妥協，最後唯有加埋我入去。」
「再次辛苦晒妳。」我又好衷心咁多謝佢。
「係同佢返去果程路，佢不停講佢同佢女朋友Ｄ事，又話佢同佢女朋友唔夾，又話佢同佢女朋友吵架，佢好唔開心……其實呢樣唔係咁緊要，最慘係阿琪又衰心軟問佢點先開心，阿富就叫阿琪煲涼茶佢飲，而阿琪答應左！！！」ＪＵＤＹ一副震驚既表情，駛唔駛咁跨啊。
而我就好冷靜咁望住佢，佢望到我咁冷靜，就話：「牛兄！你知唔知個嚴重性係邊架？」
「我知啊。」我答佢。
「你真係知個嚴重性係邊！？」佢又問。
我諗大定會錯意，我答既我知，係指……「我知阿琪要煲涼茶比阿富啊。」
ＪＵＤＹ聽到我講後，就問：「你點解知？」
「阿琪同我講左啦，佢話唔想剩係煲比阿富飲，所以問我飲唔飲，煲埋比我。」我答佢，然後佢就用一個好難以置信既表情望住我：「估唔到牛兄你又有Ｄ料到ＷＯ。」
我傻笑左下，然後ＪＵＤＹ就話：「頂！咁我未白擔心！」
「咁又唔係。」我話：「阿富其實真係要小心，但係，我覺得阿富佢而家既處境都唔多好，因為佢同佢女朋友吵架，一定好苦惱。」
「牛兄！！！而家佢係你既敵人黎架！！！你仲為佢著想！？」ＪＵＤＹ話。
「咁……阿富都算係我好朋友，雖然佢想追阿琪。」我話：「但如果佢同佢女朋友講清楚分手後先追阿琪，會好Ｄ。」無錯，我一直話阿富大鑊地大事，就係覺我佢應該分左手先追阿琪，唔好而家就開始追。
ＪＵＤＹ聽到我咁講後，用一副被打敗既樣坐左係度，「阿牛兄，我都唔知話你好人定點，人地而家同你爭女啊，你係未要諗係回同人爭啊。」
「我會諗啊，好努力咁諗。」我答佢。
「牛兄你……」ＪＵＤＹ望一望我，然後又話：「算啦，對住你真係又好嬲又好笑，阿琪真係好，有你呢個咁好既男仔鐘意佢。」
「下？」我聽完佢咁講後，都唔知應該比咩野反應。
「加油啦，有咩野可以幫到手既我一定幫。」ＪＵＤＹ話。
好，我一定記住妳講既說話。