[愛情無限loop] 就係咁，我做左女神一年既備胎: ７０　分析中

訓左係床度，成晚就不停比疑問同不甘熉到訓下又醒下，疑問當然就係呂晨既所作所為啦，而不甘，就當然係原來諗住可以同阿琪有一個開心既燒野食回憶，而家成個活動同佢少左好多交流。

而到左第二日，我約左ＪＵＤＹ食ＬＵＮＣＨ。

「點啊牛兄，你尋晚發生咩事啊？」其實本來我好想話比ＪＵＤＹ知，但面前既佢係一副等睇好戲樣，我就唔係好想講。

就係佢一輪又哄又喊話想知，到最後話請我食飯，我先一五一十將尋晚發生既事話比呢個衰妹知道。

「估唔到呢個呂晨都幾主動。」ＪＵＤＹ講完之後問我：「你記唔記得上次佢行去我耳邊講左Ｄ野既。」



我回想一下，ＪＵＤＹ講既應該係一齊去買野食果次，「記得啊。」

「佢同我講話佢要既野係無人可以阻止。」ＪＵＤＹ講完後就指住我個鼻。

我逗雞眼咁望住佢隻手指，然後問：「點解係我？」

「可能……」ＪＵＤＹ慢慢移開隻手指，「因為你鐘意阿琪掛。」

「咁我仲唔明點解佢要咁做？」我好直接咁講出我既諗法。



「女人既戰爭，通常都係來自妒忌心。」ＪＵＤＹ講完後用一個若有所思既眼神望住遠方。

「……喂，我地現代人黎架，妳未學ＴＶＢ　Ｄ古裝片望遠方啦好唔好。」我用手係佢眼前揚一揚，然後佢就用一個不屑既眼神望住我，「ＴＶＢ　Ｄ戲不知幾好睇。」

「唔好意思，我睇樂視。」我笑住咁答。

ＪＵＤＹ佢嘆左嘆氣，然後同我講：「你記唔記得，先前未講過來人，好明白你而家等阿琪既感受既。」

我又諗一諗，「有咩？」



「死仔，你呢個樣擺明係明知故問。」ＪＵＤＹ打左我一下。

「好痛啊，妳做女仔斯文Ｄ好唔好。」我講笑咁話，但估唔到ＪＵＤＹ用好認真既眼神望住我，然後話：「佢……都咁講。」

「邊個佢？」我問。

「我鐘意果個人。」佢答。

「妳男朋友？」因為我知道ＪＵＤＹ本身拍緊拖。

「唔係。」ＪＵＤＹ搖一搖頭，「我鐘意果個人，我得唔到，但我唔鐘意果個人，卻甩唔到。」

「下？」佢講呢句野咁似黃子華講過果句既……唔係，係直頭一樣添。

佢微笑左一下，然後話：「你地未成日話Ｄ女神成日收兵既，其實，男神都會。」佢微笑間，帶著甜，不過又有Ｄ苦，「我係一個做人地隻兵既女人，但同時又係一個有一隻兵既女人。」



「下？」係，我又下左一次，佢呢句姐係點？姐係同一時間虐待一個人，但同一時間被另一個人虐待？咁平均？

ＪＵＤＹ佢無理過我一臉疑惑既樣，只係不停用手指玩緊一塊係佢沉左好耐既檸水入面，抽左出黎既檸檬，然後話：「當我一心一意為自己愛既人付出既時候，總覺得佢做既所有野都係正確，無論佢所做既野係對我有傷害既，我都會默然承受。而一個愛我既人不停為我付出，而我又不停咁對佢做出好多傷害佢既野，我有覺我好有成就感。我就係生活係呢兩個男人之間，生活係果種患得患失既感覺入面，我知道，我真係知道架，到最終我會選擇一個佢愛我比我愛佢既人，但係我仲係唔捨得放棄帶比我傷痛剌激果個人……所以……」

ＪＵＤＹ講講下，眼角流左一滴眼淚出黎，唔知點解，我覺我而家眼前既佢，原來成受住好多無形既壓力。

佢擦左擦眼淚，然後話：「我明白做女神做男神果種快感，因為我以前都經歷過好似阿琪同呂晨既情況，而我更加明白做人隻兵做人備胎果種感覺，你會話佢地自己攞嚟衰，但係佢地眼中呢Ｄ只係光榮嘅戰績，就好似而家既你咁。」

我繼續望住佢，唔知講Ｄ咩好。

現場，尷尬左一陣，「不如講返呂晨先……」「辛苦妳。」係，我講左辛苦你，唔知點解，我好想係呢一刻講呢句。

ＪＵＤＹ聽到我咁講後，笑左笑，「未扮晒野啦你，我唔會睇上黎架，我而家一心諗住係我身邊周旋既果兩個男人入面選擇架乍。」佢突然開懷咁笑。



我見到佢咁，都一齊笑。

「講返呂晨啦咁。」ＪＵＤＹ話：「係我頭先聽完你所講既野，我更加覺得呂晨唔係果間屋度住。」

「點解呢？」我問。

「就好似你所講咁，一個女人既房入面，點都會有個梳妝枱，但你尋晚係佢間房入面竟然無，我本來諗可能果間房唔係佢架啦，但你有話見到有好多佢同另一個男仔影既親蜜合照，咁如果唔係佢間房的話，可能……」ＪＵＤＹ一臉若有所思咁話：「……唔通，係佢男朋友間房？」

「下？」係啊，我今次係呢一話下左三次，如果ＪＵＤＹ估得無錯既話，一係就係呂晨養埋條仔係自己屋企住，一係就係果度係佢男朋友屋企。