[愛情無限loop] 就係咁，我做左女神一年既備胎: ６７　汽水浴

燒野食去到咁上下，緊係要拎Ｄ野飲，而今日我地準備左好多汽水同啤酒，而且金姐仲煲左涼茶同糖水。

「有無人想拎野飲？我幫你地拎埋。」呂晨呢一刻問。

「ＷＥＬＬ～好似呂晨呢一種美女，咁好開聲問我地拎野飲，我又點可以唔幫妳手呢。」艾倫佢一路講一路企起身，行左去呂晨旁邊。

「仲有我，我咁大隻緊係要幫手拎野架啦。」東尼有把握機會了。

而呂晨就望住我，就話：「牛牛～你都要過黎幫手。」



下？無啦啦咁比人點名都有？

「你囉牛兄，人地女仔黎架，你就去幫下手啦。」菜老闆，你玩野啊，你唔幫我都唔好咁害我啦，我見到你而家係陰陰咀笑緊啊。

「係囉牛兄，去啦。」估唔到菜老闆呢一句話，引起所有人既共嗚……

咁……我唯有去啦。

而阿琪見我起左身，佢就話：「我又……」



「阿琪，我燒左腸仔妳食啊。」「阿琪，我燒左魚蛋妳食啊。」「阿琪，我燒左墨魚丸妳食啊。」「阿琪，我燒左獅子狗妳食啊。」「阿琪，我燒左雞翼妳食啊。」「阿琪，我燒左雞排妳食啊。」……

你地班友仔係未夾埋架……又會無啦啦燒左咁多野食比阿琪食既……

ＪＵＤＹ同金姐見到呢個情況，笑到喊緊，而阿琪就好尷尬地望住比野食佢果班人，拒絕又唔係唔拒絕又唔係……

「行啦我地。」呂晨係呢一刻拉走左我，而艾倫就係後面跟住。

行左入房，呂晨打開左個雪櫃，「不如我地拎多Ｄ出去，等佢地拎得方便Ｄ好唔好啊？」佢呢個提意係好好，但點解我見到佢係露出一個有陰謀既笑容講既。



「ＷＥＬＬ～呂晨小姐既提意真係好，等我幫妳手拎Ｄ汽水放入個箱仔先。」艾倫用左好快既動作，放左幾罐野飲落個細箱度。

「一陣就睇我表現啦。」東尼露出左佢個隻手瓜。

而係呢個時候，呂晨就話：「不如你地兩個拎呢箱出去先，我頭牛牛一陣再拎另一箱出去。」呂晨一講完，艾倫就話：「點可以要呂晨妳……」佢都未講完，呂晨就用佢秒速眨眼技術眨死左艾倫既心。

「好……我拎。」艾倫反晒白眼咁拎起箱野，而呂晨又重施故技對東尼眨多次，東尼都係一樣反晒白眼幫艾倫拎左箱野出去。

而家，就得返我同呂晨兩個人。

「牛牛～」呂晨好嬌嗲咁話。

唔可以理佢咁多，我認真咁拎汽水好過。

「牛牛～」佢又講多次。



時運高，聽唔到，時運高，聽唔到……

「牛牛～」佢呢一次叫我，加左輕掃我背，我成個人即時彈起。

但……估唔到……

我拎住手中好幾罐既汽水跌左落地，爆左不停噴緊，噴緊係我身上面，我為左避不停亂郁，但估唔到我整到其他既汽水都跌左落地，而佢地都爆開左，跟住……跟住唔駛我講啦……

唔駛一分鐘，我成身比Ｄ汽水噴濕晒，而我望住我眼前既呂晨，覺得好驚訝，點解佢會無濕度架！？

「牛牛～點解你咁蠢Ｄ汽水爆晒都唔避既。」呂晨一臉得呈既笑容望住我。

我望一望滿地既空罐，無理由既，汽水爆左係會噴，但都無理由會噴到咁勁架，唔通……我望一望呂晨，佢仲係一副得呈既笑容，唔駛估啦，佢肯定搖過晒Ｄ汽水。



「牛牛～你整到濕晒，不如去沖一沖先啦。」佢無啦啦咁講，我覺得好可怕，正當我想拒絕佢既好意果陣，佢已經捉住左我跑左上樓上，唔知點解佢可以咁大力，我想用力甩開佢都甩唔到。

行左去一間房，佢推左我去一個浴室，推左我去浴缸度，開左花灑對住我起勢咁噴，佢仲係果種得呈既笑容望住我，然後話：「我去拎Ｄ衫你換，你等下。」

究竟……究竟發生左Ｄ咩事？點解我無啦啦比呂晨佢推到，而且仲要係浴缸度，最緊要係樓下仲有一班人燒緊野食，最重要係呢班人入面仲有阿琪係度。