[愛情無限loop] 就係咁，我做左女神一年既備胎: ６６　燒野食大會開始

下午茶，係好和平之中渡過……起馬我覺得好和平，可能因為狗公們對呂晨既行為已經見慣見熟，以及女ＦＡＮＳ們對阿富既仰慕眼神都已經睇左成朝早，都唔會覺得礙眼……

只係，阿琪，佢好似突然間融入唔到大家既氣氛咁。

其實，我都係。

食完下午茶，大家就準備燒野食既野，男士們就當然負責勞動方面，除左阿富，因為佢整親腳，所以去左女仔果邊幫手準備野食。

「阿富真係一個好細心既男人，你睇佢包Ｄ野食包得幾靚。」其中一個女ＦＡＮＳ話。



「係囉，識煮野食既男人係最俘虜到女人既心。」又一個女ＦＡＮＳ講。

「如果我男朋友好似阿富咁就好拿。」阿女ＦＡＮＳ，如果比你男朋友聽到佢應該會好傷心。

ＪＵＤＹ聽到呢班女ＦＡＮＳ既說話，不停咁反白眼，而金姐就無理佢地，只係埋頭苦幹，而阿琪，都係一樣，佢好似唔多想理阿富同女ＦＡＮＳ們既說話。

不過當女ＦＡＮＳ們每講一句話，阿富都會傻笑，然後望一望阿琪有無望佢，但當佢發現阿琪無望佢，佢又會好黯然咁傻笑一下。

「喂，牛兄，專心Ｄ搬野先好唔好啊，唔好掛住望女仔先。」同我一齊搬野既呢位，就係我先前講過，結左婚有仔女既好爸爸，佢因為要照顧仔女所以而家先到。



「唔……唔好意思。」我同佢ＳＡＹ　個ＳＯＲＲＹ後，佢都望一望我所望既方向，然後話：「牛兄，放心啦，無事既。」

「下？咩野無事？」我問佢。

「心照啦你。」佢永遠講野都係咁隱晦。

呢個好爸爸我地都叫佢做菜老闆，但佢係一個打工仔唔係菜老闆，但唔好問我點解佢會有呢個稱呼，我都係跟其他人咁叫佢。

我諗，佢講緊既係我望阿琪既事。



其實由頭先到而家，我都好想去幫阿琪手，但係我又比班狗公拉左黎幫手，都唔知佢地係未特登。

日落，我地已經開好左兩個爐。

「燒野食大會開始！！！」我地大叫一聲後，就每人拎住支燒烤叉對去個火爐度，其實咁大班人一齊，食咩都無所謂，最近要係大家可以開開心心咁玩一晚。

今日，狗公們雖然都係圍住呂晨同阿琪轉，但係都比平時收斂左好多，可能，佢地都知道呢一刻係大家開開心心咁玩，唔好為左個人利益影響到一個開心既晚上……我以為。

而我都唔諗咁多，我同ＪＵＤＹ拎左好多野燒，諗住今晚食餐勁。

阿富最後就搵到個好位可以同阿琪坐，但成晚阿琪好似食左好少野，定係，我無咩點理佢唔知佢食左幾多野呢？

食到咁上下，ＪＵＤＹ無啦啦同我咬耳仔講：「阿琪成晚望左你好多次啊。」

「下？」我無咩點理，食緊碟上面既豬排。



「我話，阿琪成晚望左你好多次。」ＪＵＤＹ又重覆左一次佢講既野，我望一望阿琪，見到佢望左過黎，再同ＪＵＤＹ講：「佢係望我地姐，唔係剩係望我。」

ＪＵＤＹ用一個難以置信既表情望住我，「仲以為你聽到阿琪成晚望你好多次，你會好開心添。」

開心？會咩？如果我可以坐係佢旁邊，我諗應該會仲開心。

係呢個時候，我同阿琪對到眼，我見到佢因為食野既關係，嘴角有小小污糟，所以我指左指自己既嘴角，眼神話佢知污糟左。

佢見到我咁做就擦一擦嘴角，然後傻笑左一下。

其實，咁樣眼神溝通都唔錯啊。

唔知係未阿富見到我同阿琪有眼神接觸，佢突然間拎起果碟佢燒好左好耐既蝦，同阿琪講：「阿琪，我拆蝦妳食。」說時遲那時快，阿富已經拆好隻蝦仲諗住喂阿琪食。



但阿琪見到佢呢個行動，就即刻話：「唔好，我唔食蝦。」佢呢一句係叫出黎，所以全場人都聽到。

「阿琪唔食，我要食。」其中一個女ＦＡＮＳ即刻把握機會啊大口等阿富喂。

阿富只好尷尬地放左隻蝦係果位女ＦＡＮＳ度，然後，阿富望一望我。

我避開左阿富既目光……點解？點解我會咁做？點解我會避開佢既目光？我呢個行為比ＪＵＤＹ、金姐同菜老闆睇到，佢地三個人互相對望同笑左笑……

點啊你地三隻死野，又睇到Ｄ咩而我係唔知架？