[愛情無限loop] 就係咁，我做左女神一年既備胎: ５９　一見鍾情與日久生情

返到屋企，今次我係好慢咁打開個鐵匣，因為我驚嘈醒……「仲咩咁大陣酒未啊，比你娘親知道你飲咁多就你實死。」

唔駛驚啦，已經嘈醒左。

「阿爸。」我對住老牛大人講，無咩心機咁講。

「搞咩啊你，咁既死款既，又比女飛啊。」老牛大人佢講笑咁講，但我真係笑唔出聲。

我無咩點理佢呢句說話，就只係問左佢一個問題：「阿爸，你果陣係點追阿媽架？」



老牛大人見到我咁認真問佢，同都好認真咁望住我，然後搭住我膀頭行去屋企個露台仔，然後話：「當時你娘親好多人追架，但係佢都不為所動，而我未係佢身邊不停咁等囉。」

「不停咁等……」我望一望佢，然後問：「但你先前唔係話你都會約阿媽去行街，仲搞大左佢既肚又盛既？」

「咁都要追到手先做到呢Ｄ野架。」佢又一巴打左過黎，「點解你Ｄ阿哥咁醒，但生得你咁蠢既。」

「你就不停咁等佢？」我又問佢。

「咁追女仔，一係就好快手追到，一係就有排都追唔到架啦。」佢同我講：「我地做男人係蝕底Ｄ架拿，男追女隔重山，女追男隔層紗，除非你係有錢仔又或者你阿爹有錢啦，如果唔係你都只會係追女行列。」



係呢個時候，我靈機一動咁望住佢：「所以我追唔到女仔，其實都可以話因為阿爸你無錢？」

又一巴打左過黎：「仆街仔，串我啊。」

「唔敢唔敢。」我傻笑左幾下，然後又問：「咁你就一直等阿媽鐘意你？」

「傻仔，呢個世間上有分兩種女仔，一種係好易追既女仔，一種係好難追既女仔。」我聽完阿爸咁講後，呆左咁話：「你頭先講左野架拿？」

「屌！你咁撚蠢咩都要講到咁白架。」老牛大人睥左我一眼後講：「易追果Ｄ，可能係因為物質同靚仔關係，但如果唔講呢兩個關係，就係佢地未試過戀愛，呢Ｄ女仔都會好渴望愛情，會好冀盼自己第一次既戀愛係點，所以呢Ｄ女仔一有人追既話，而追佢果個人條件唔太差，就可以追到架拿。」



佢講完之後靜左幾秒望實我，然後問：「消化完未啊？」

「仲消化緊。」我答。

「咁你聽埋呢個一齊消化啦。」老牛大人又講：「難追果Ｄ，通常就係眼角高又或者有好多人追，根本就睇你唔上眼，所以再追都無用，再過落去就只會係傻仔一名，但除左咁，仲有一Ｄ女仔係經歷過幾次戀愛，想慢慢咁找尋一段好既關係，所以會不停咁觀察追佢既人，時間話短唔短，話長唔長，但最緊要，都係果樣野。」

「邊樣野？」我問。

「感覺。」老牛大人話：「易追既女仔有感覺叫一見鍾情，難追既女仔有感覺叫日久生情，明白未啊傻仔。」

「所以，阿媽對你係日久生情。」我話。

「好彩你都傻唔晒。」老牛大人好欣慰咁同我講。

「但係咁樣等落去，未好辛苦囉？」我又問。



老牛大人諗左一諗然後答我：「都係架，但係當你真係愛一個人既時候，你都會覺得所有野只係一個測試，測試你有幾愛佢，每次都會用一個過埋呢次佢就會同我係埋一齊既心態去做所有野，就算到做完後佢都無同你一齊，你都會安慰自己，因為今次自己未盡力姐，然後會周而復始咁繼續落去。」

我聽到老牛大人咁講後，無出聲，沉默咁諗我以後係未好似老牛大人口中所講咁。

「要令一個人日久生情，係好難，但係仲有一樣野係仲難。」老牛大人又彈左句至理名言出黎。

「係咩？」我問。

佢笑左笑然後同我講：「等你下次再有野煩，我先講你知。」佢摸左摸我個頭一下，然後就入返房。

而係呢個時候，我部電話響起，又係一個新群組既ＭＳＧ，我打開呢個群組，「玩食飲三人組」三個字令到我笑左笑，而係群組下面係一個「您」字同我都識既兩個名，阿琪同ＪＵＤＹ係呢個ＧＲＯＵＰ入面。

阿琪：以後我地可以係度約食飯同飲野（喊笑）
ＪＵＤＹ：好啊



我望住部電話，繼續諗頭先老牛大人既說話，然後阿琪佢ＳＤ左個ＭＳＧ比我。

阿琪：返到屋企未啊？
我：返到拿
我：妳快Ｄ去訓啦
阿琪：嗯（笑笑）
阿琪：我今日真係好開心啊
我：開心就好
阿琪：ＪＵＤＹ問你果條問題
阿琪：你不停點頭
阿琪：開心

係頭先返黎途中，我都有問ＪＵＤＹ其實頭先佢問我Ｄ咩，而ＪＵＤＹ就話：「我問你係未鍾意阿琪，然後你未不停點頭囉。」



諗返起頭先所發生既一切，會心微笑左出黎，而我決定，做老牛大人講過既野。上一段感情係個女仔對我一見鍾情，今次，我要令阿琪慢慢日久生情。

就係咁，我踏上左呢一條長征之路。