[愛情無限loop] 就係咁，我做左女神一年既備胎: ５８　拒絕！？

講真，係我而家既狀態下玩ＴＲＵＴＨ　ＯＲ　ＤＡＲＥ，根本就無意思，事關我聽又聽唔到佢地講咩。

但我只係見到佢地拎左骰盅出黎，我見阿琪好似講左Ｄ野咁，但係我又聽唔到佢講咩，只好不停咁點頭。

佢地兩個望住我係度傻笑，其實我都唔知佢地笑咩。

我見佢地搖骰，我就跟住搖，見佢地開左盅，我就跟住開，ＪＵＤＹ係我開完盅之後，望住我不停拍枱大笑，我再主一望我地每人所搖既骰仔，原來係最點數細果個要揀，而我就係點數最細果個。

ＪＵＤＹ好興奮咁對住我講左Ｄ野，但我真係聽唔到，但我見佢好似不停重複緊同一句咁，我諗，佢係想問我揀ＴＲＵＴＨ定ＤＡＲＥ。



「ＴＲＵＴＨ。」我答左佢，然後又見到佢不停對住我講野，雖然我唔知佢問咩，但我都是鬼但咁點頭回應佢。

佢見我點頭，就奸笑咁望住我，然後再望一望阿琪，我見到佢望阿琪時我都望住佢，而阿琪唔知點解笑左笑，好似好開心咁，唔通條問題係開佢事？

再下一輪，我既聽力都係未好得晒，而今次到ＪＵＤＹ輸左，阿琪對住佢講左Ｄ野後，個衰妹就好大力咁拍枱同講左一個字，我睇佢口型，估仍應該係大叫左個ＤＡＲＥ字。

我諗我無估錯，因為阿琪對住佢講左一輪野之後，ＪＵＤＹ就企左上張枱上面跳舞，阿琪望住ＪＵＤＹ笑得好開心，係笑既途中佢仲挨落左我度。

可能時間過左陣，我Ｄ酒意無咁大，聽力開始大返Ｄ，可以聽到佢講野，但係都係好細聲，一句說話只係聽得到一兩個字。



再下一輪，今次到阿琪輸左。

ＪＵＤＹ望住佢問，而睇阿琪口型，佢應該揀左ＴＲＵＴＨ。

ＪＵＤＹ呢個衰妹奸笑咁諗左一陣，然後對住佢口郁郁時，仲望一望我……下，關我事架呢條？

佢既問題我聽唔到咁多，我只係聽到，「如果……妳……唔會……揀……」我已經好努力去聽，但係都只係聽到佢講呢Ｄ。

而我見阿琪好認真咁望住ＪＵＤＹ話：「……好朋友……唔……進一步……」



唔通……阿琪係話佢同我係好朋友……唔想同我有進一步……

但點解ＪＵＤＹ聽完之後會望住我奸笑呢？

我地只係玩左三次，然後見時間都唔早就埋單走人，行出酒吧，吹左陣風，個人都醒左好多，而我既聽力都慢慢恢復。

「其實頭先妳地兩個問左Ｄ咩，我一句都聽唔到。」我係佢地兩個身後話。

「牛兄，呢Ｄ說話只有一次機會聽，過左就無架拿。」ＪＵＤＹ好得戚咁話。

而阿琪都笑住附和：「係啊，得一次機會架乍。」

唔通，呢次會成為我既遺憾？

我地見大家都有少少醉，所以提議坐的士返去，一路上，我住左係司機位不停咁重組頭先我好辛苦聽到既說話，但點切都係話我同阿琪係無機會。



而佢地兩個就係後面訓左陣。

到落左車，我同ＪＵＤＹ先送左阿琪返去，然後我送ＪＵＤＹ返屋企途中，ＪＵＤＹ就同我講：「牛兄，慢慢黎唔好急啊，追阿琪要等下架，知唔知？」

佢呢一句說話唔通係想安慰我？

「你唔係無機會，只不過，係阿琪而家唔想拍拖住姐。」佢話重心長咁同我講：「我先前都有幫你打聽過口風，有次阿琪ＳＤ　ＭＳＧ比我，同我講話覺得你鐘意佢，問我要點樣拒絕你先唔會傷害到你。」

咩話！？拒絕我！！！咁姐係我頭先聽到話同我係好朋友，唔可以有進一步係真架啦！！！

「喂，我未講完啊，你唔好成副死樣先啦，佢拒絕你唔係因為對你無好感，係佢呢個時間真係唔想拍拖，唔想你浪費時間姐，不過我睇得出，你係阿琪心目中係有一定既地位，其實佢都對你有好感。」

「下？」我唔係好明ＪＵＤＹ既說話，有好感但又唔想同我拍拖？



「等下啦，阿琪話呢個時候唔想拍拖，姐係有Ｄ事情佢想解決左先，你未慢慢係佢身邊等囉。」ＪＵＤＹ拍一拍我個膀頭話：「等既日子唔易過，我係過來人，會明白你。」

「妳係過來人？」我問。

「來日方長，遲Ｄ話你知，夜拿，早Ｄ返去訓啦。」ＪＵＤＹ講完呢句就返左上樓。

而我，就慢慢行返去屋企，腦海中不停諗緊頭先ＪＵＤＹ既說話，而呢個時候，阿琪傳左ＭＳＧ比我。

阿琪：返到未啊？
我：未啊
我：不過就到
阿琪：我等埋你返到先訓
我：唔駛啦，妳早Ｄ去訓啦，今日出左成日街都累拿
阿琪：今日我好開心啊



我見到阿琪呢一句後， 猶疑左一下，然後覆佢。

我：我都係

真係？我真係開心？我只知道而家既我，百感交集，到底，阿琪佢對我……係點……