[愛情無限loop] 就係咁，我做左女神一年既備胎: ６０　早晨既開戰

懷住一Ｄ醉意，加上老牛大人既一見鍾情同日久生情理論，以及決定漫長抗戰既心情入睡，今晚，訓得好好，無發夢，無紮醒，一覺訓到大天光。

新既一日，呢一次本身係打邊爐但中途變左做燒烤大會既大圍約會，究竟會發生Ｄ咩野事，又係會點樣完結，無人知，亦都唔想理咁多，用返阿琪成日講果句：「到時先算。」

無錯，所有野都係未知既事，做咩要為Ｄ未知既事影響到自己。

被選中左做幫手大軍既我，今日約左阿琪同ＪＵＤＹ然後先ＪＯＩＮ大圍，但係到左約定既地點，咦？點解除左阿琪同ＪＵＤＹ之外，仲多左個人既……

果個人，係阿富。



「早晨。」阿富好友善咁頭我打招呼先。

「早晨。」我禮貌地回應佢，而同時見到ＪＵＤＹ係旁邊反晒白眼無眼睇咁。

「如果人齊就行。」發號施令既係阿富，佢行到阿琪既身邊，然後同佢講：「我幫妳拎袋？」

說話都未講完阿富已經行動上拎左阿琪既袋，但係比阿琪搶返話：「唔駛，你咁想拎就去拎ＪＵＤＹ果個。」

「痴線，鬼要佢幫我拎。」ＪＵＤＹ快人快語咁話。



估唔到一大早我以為可以比較平靜既時候，變左成戰場……

阿富微笑左一下，然後圓場咁話：「唔緊要啦，咁行啦。」

歷年果然係比我多既人，如果面對咁既情況，我一定只係識得傻笑唔知講咩野好，阿富係我心目中係一個好好既男人，就係我係男既，都覺得佢會係一個好男友，好老公，所以ＧＲＯＵＰ入面有咁多女ＭＥＭＢＥＲ鍾意佢都好正常。

但佢已經名草有主，如果唔係，Ｄ女ＭＥＭＢＥＲ一定會瘋狂追佢。

只不過……而家……我目到阿富對阿琪Ｄ動靜，以及金姐同ＪＵＤＹ既說話後，對佢有另一Ｄ睇法。



一齊起行，而家既陣型係阿琪同阿富兩個人行左前面，而我同ＪＵＤＹ就行左係後面，我問ＪＵＤＹ：「點解阿富會係度既？」

「阿琪話阿富知道左佢約左我地兩個，死都要跟住黎ＷＯ。」ＪＵＤＹ答我。

「竟然。」我聽到佢既回答後，點解有一種感覺係一個男朋友唔想女朋友同一Ｄ男性朋友去約會咁。

我望一望前面既阿琪同阿富，佢地兩個無咩交集，而且當阿富想行近阿琪，阿琪就會行開保持適當既距離。

「估唔到一大朝早就有好戲睇，睇黎今次大把花生食。」ＪＵＤＹ笑住咁講，而我望住佢話：「妳真係好仆街。」

「有好戲唔睇，折墮架。」佢答。

其實阿富既出現，我都有少少唔開心，因為我今朝早滿心歡喜可以同阿琪一齊去，而家就好似變左我同ＪＵＤＹ兩個係電燈膽咁。