[愛情無限loop] 就係咁，我做左女神一年既備胎: ５５　等睇好戲

同阿琪及ＪＵＤＹ兩個人行街，同平時剩係同阿琪行街既感覺係……好似佢搶左阿琪咁，係佢地兩個後面，我只可以感謝上帝，好彩佢係將ＪＵＤＹ整做女人，如果佢係個男人的話，我一定唔夠佢爭阿琪。

其實散左ＢＡＮＤ之後離想去飲野既時間仲有好耐，我就提意不要搵Ｄ野打發下時間，唔好剩係行街，因為我知道阿琪係一個唔鐘意行街既女仔，除非係行超級市場同埋街市。

但ＪＵＤＹ好似行得好興高采烈咁款，阿琪見到佢咁都話唔緊要，佢都有Ｄ野想買。

阿琪真係一個好善解人意既女仔。

而一路行，我地都一直討論緊頭先呂晨既舉動。



「你地有無發覺頭先呂晨既舉動好其怪？」ＪＵＤＹ問我地兩個。

「妳意思係佢一入到屋就無再用嗲聲嗲氣講野？」我問。

「呢個其一啦，其二就係點解佢好似唔係住係果度咁，拎抽鎖匙姐，要成九個字先搵到。」ＪＵＤＹ話。

「唔出奇啊，如果唔見再抽鎖匙既話，我都成日唔記左鎖匙要人救架啦。」阿琪笑笑口咁講。

係，阿琪真係可以好大頭蝦，我都救過佢幾次唔見鎖匙，甚至要幫佢配定。



「唔關事，呢Ｄ係妳份人無腦姐。」ＪＵＤＹ直接既回應，令到阿琪扁晒咀仔咁望住佢，扁晒咀仔既阿琪真係好可愛。

而ＪＵＤＹ就繼續，「自己屋企度門發鎖左，下意識可能真係會先試下係未開度，但係開唔度後就應該醒目地去搵鎖匙試下開唔開得返度門，但佢好似無咁既諗法，原因可能就係，根本佢唔係住係呢度。」

「咁……可能佢有想搵機會嗲阿牛佢呢。」呢句說話，出自阿琪把口唔知點解聽落有Ｄ怪。

ＪＵＤＹ好認真咁諗左一諗，然後望一望我，又話：「我唔排除有呢個可能性。」

「下！？」我望住ＪＵＤＹ然後問：「點解無啦啦又會關我事？」



「你記唔記得今日呂晨有行到我耳邊講左Ｄ野之後走開左？」ＪＵＤＹ問我地兩個，而我地兩個都點一點頭。

「佢同我講：『我一定會搶到阿牛，我一定會嬴到阿琪。』，佢係咁樣同我講。」ＪＵＤＹ講完之後，我尷尬地望一望阿琪，而我見到阿琪都好尷尬咁笑左一笑。

「都唔知點解呂晨會睇中左你。」ＪＵＤＹ呢一句整到我同阿琪仲尷尬。

「總之今次燒野食真係唔簡單。」ＪＵＤＹ露出左一副等睇好戲既笑容望住我同阿琪。