[愛情無限loop] 就係咁，我做左女神一年既備胎: ５４　小風波終於完

我地最後等左好耐先等到呂晨拎條鎖匙黎開左度門，而開果陣，佢不停話：「我唔記得左放邊，搵左好耐唔好意思。」

「ＷＥＬＬ～靚女通常係無記性既，唔緊要。」艾倫話。

「係呂，我好讚同艾倫既說話。」東尼講。

而ＪＵＤＹ本來想講野，但係阿琪輕輕撞一撞佢，搖一搖頭示意叫佢唔好講後，ＪＵＤＹ就無出聲。

而我見到咁就打圓場，「搵到就得啦。」



「都係牛牛最好～」呂晨又用返嗲聲嗲氣咁講。

散ＢＡＮＤ走人，呂晨送左我地出黎之後，佢就返屋企，而當然艾倫同東尼又要話送返呂晨返去擾攘一番。

無左呂晨在場，阿琪就成為左艾倫同東尼既目標，但係ＪＵＤＹ在場既話，佢地兩個既狗公招數根本發輝唔到用場。

最後佢地兩個就失敗而回，得返我、阿琪、ＪＵＤＹ同埋阿富。

「你地一陣會去邊啊？」阿富話，但唔知點解佢係望住阿琪問我地。



「我應該返屋企掛……」我答佢，但阿富既眼中好似無我同ＪＵＤＹ既存在，只得阿琪一個人。

阿琪比佢望到好唔好意思，佢唔敢真望阿富，只係望向我，然後話：「一陣阿牛同ＪＵＤＹ會送我返去。」

「咁我地一齊啦。」阿富話。

「唔好，我同佢地仲想行一陣。」阿琪話。

「無所謂啊，我一陣都無野做，一齊行啦。」阿富既回答令到阿琪無言而對。



而ＪＵＤＹ見到咁，就拖實阿琪然後同阿富話：「佢都話想同『我地』行一陣，係『我地』啊，知道未啊。」ＪＵＤＹ好強調「我地」呢兩個字，仲係講果陣指一指我同自己。

阿富見到只可以話：「……咁好啦，妳返到去話我知拿。」

我見住阿富好黯然咁走，有少少同情，但又有少少得意既感覺。

「阿富，好似有Ｄ野ＷＯ。」ＪＵＤＹ對住阿琪話，而阿琪只係嘆一嘆氣，ＪＵＤＹ就繼續講：「佢鐘意左你。」佢好斬釘截鐵咁話。

先前金姐叫我小心阿富，而家ＪＵＤＹ仲直接咁講阿富鐘意阿琪，唔通真係……「但阿富有女朋友架ＷＯ。」我話。

「有女朋友就唔鐘意得其他人架咩？」ＪＵＤＹ講完之後話：「牛兄，你呢Ｄ只經歷過單純既戀愛既人，係唔會明白我地面對住複雜關係既人既諗法架。」

比佢咁樣一講後，我無回應，而阿琪就話：「今晚我想飲野啊，你地陪我好唔好啊？」

「好啊。」ＪＵＤＹ好開心咁話。



而我，就點左點頭：「……好。」