[愛情無限loop] 就係咁，我做左女神一年既備胎: ５１　炭？燒烤叉？

我望住買左既野，心中不停有個問題，一開始我地唔係話要打邊爐既咩，但點解而家要買炭同燒烤叉既？

我望一望阿琪，佢用眼神問我咩事，然後我話：「我地係打邊爐定燒烤？」

阿琪望一望堆野，都回一回神，「係ＷＯ，我地好似係要打邊爐架ＷＯ。」

然後我望一望在場一行人，其他人都你眼望我眼咁，而阿富就係呢個時候話：「頭先呂晨話想燒烤多過打邊爐，係ＧＲＯＵＰ問左金姐佢地，佢地話無問題，之後……」阿富講到呢到都唔知講咩好。

而呂晨嗲功又出現，「耶～咁人地想燒燒多過打邊邊嘛～你地唔鐘意咩～」



「鐘意！緊係鐘意啦！」東尼傷住話。

「ＷＥＬＬ～燒野食，正啊！」艾倫你仲流緊血就唔好咁多野講啦。

而ＪＵＤＹ就白一白眼話：「燒野食無所謂啊，但妳唔好講咁多野就得。」嘩，ＪＵＤＹ妳駛唔駛咁直接啊。

呂晨突然間睥住ＪＵＤＹ話：「妳講咩撚野？」

等等，頭先係我聽錯定點？呂晨原來識講粗口架？



「我叫妳未撚咁多野講，扮聲好撚聲苦架，比把聲休息下啦，小心聲音拗柴啊妳。」ＪＵＤＹ無直視呂晨講左呢句。

ＪＵＤＹ姐……可唔可以唔好勾起Ｄ無謂既戰爭……

只見呂晨佢嬲到紅都面晒，仲成身震埋，唔通，呂晨要發火！？

但係我諗錯左，佢無發火，而係發姣……「耶～好衰架～牛牛啊～佢蝦我啊～仲唔快Ｄ幫人地～人地喊喊拿～」佢竟然走左埋我度，伏左係我膀頭……

其實咁無所謂，只不過佢係推開左阿琪然後行去我旁邊。



面對咁既情況，我可以做既就係向ＪＵＤＹ求救。

「又係我！？」ＪＵＤＹ佢講左出聲。

「你駛唔駛講出口啊？」我無奈咁望住佢。

「咦，我心聲黎架ＷＯ，咩我講左出口咩？」ＪＵＤＹ大笑咁話，而我點左點頭回應。
ＪＵＤＹ笑完後，就拍一拍呂晨話：「耶～好衰架～人地邊有蝦妳ＷＯ～人地只係用最真誠既一面同妳講野姐～我先無妳咁假要扮野喔～」

大家唔好懷疑，頭先講野果個人係千真萬確既ＪＵＤＹ，我好明白你地會懷疑係正常，因為當我見到佢咁樣既時候，都唔係好相信自己既眼睛。

阿琪見到ＪＵＤＹ咁，竟然係度大笑，而其餘既人就呆左望住佢，當然呂晨都有望住佢，只不過，呂晨係用一個充滿敵意既眼神。

ＪＵＤＹ繼續發輝可愛教主ＭＯＤＥ講以下既說話：「仆～街～啦～妳～」



姐係咁，我第一次見到人地扮可愛講粗口，果種感覺，和諧得黎其實都幾欠打。阿琪聽到後已經開始爆笑，而呂晨見到後，推開左我，行左去ＪＵＤＹ度係佢耳邊講左句後，就行左埋一邊。

ＪＵＤＹ露出左一個勝利既笑容，然後話：「走拿，係未要拎Ｄ野去……呂～晨～度～啊～」

「……好啊，走拿，出發。」見ＪＵＤＹ咁講我緊係快手打完場啦，大家聽到我咁講後都拎野走，向呂晨屋企出發，如果唔出發既話，可能會繼續尷尬落去。

而當行緊果陣，我行左去問ＪＵＤＹ，「頭先佢同妳講咩野？」

ＪＵＤＹ笑左笑話：「呢Ｄ係女人既戰爭，你唔知好過知，不過，你要小心Ｄ。」

下！？我要小心Ｄ？小心Ｄ咩野？