[愛情無限loop] 就係咁，我做左女神一年既備胎: ４８　三人行

我地一行人去到一個超級市場入面，分配緊大家要買Ｄ野，當傾好左我地應該要買Ｄ野後就到左點樣分配人手，係啊，就係最煩既分配人手啊。

果兩個狗公當然想揀阿琪同呂晨一組去買啦，但阿琪不停向我發出求救信號，我當然醒目啦。

「有無人想同我一齊買野飲？」我問，然後阿琪好似知道我想點咁就即刻答：「我要。」

「我都要。」「我都要。」呢兩句道話同一時間彈出，唔係艾倫同東尼講既，而係阿富同呂晨講既。

呂晨唔知係未沖住我先講咁既野，而阿富，應該係沖住阿琪，我地兩個望到咁既情形，都同時做出左一個動作……就係一齊向ＪＵＤＹ求救。



ＪＵＤＹ見到我同阿琪望住佢咁，反左反白眼，然後阿琪再用絕招我見猶憐，ＪＵＤＹ最終屈服，「唔好意思，我地同先講好左要一齊買，所以你地再分啦。」

最後既分組，變左我、阿琪同ＪＵＤＹ三人，阿富就同呂晨，果兩隻狗公就好燥底咁一組。

呢個組合係我覺得最滿意既組合，但其他人點諗，我就唔知拿。

其實同阿琪係超級市場買野，係成日發生既事，只不過今次有Ｄ唔同，多左ＪＵＤＹ係度。我係後面推住架車，而佢地兩個就係前面撓住手行緊。

我望住佢地兩個，心諗，我幾時先可以可以ＪＵＤＹ咁，可以比阿琪撓住隻手行呢，到時唔知係咩野感覺架呢？我高個阿琪，佢撓住我果陣應該可以剛剛挨到我個膀頭。



諗下諗下，失左暈咁撞到前面既佢地。

「作死你啊牛兄，撞到我隻腳咁痛。」ＪＵＤＹ捽住比我撞到既腳話，而阿琪就無出聲，但睇佢個面容應該好痛。

「妳無事嘛？」我行去阿琪度扶佢。

「無事。」佢痛住向我微笑左下。

仆街了！齊親女神添！呢次點算好！？佢會唔會因為咁嬲左我架？



而ＪＵＤＹ就一巴打左過黎，「阿琪話佢無事啊，你就係度發夢，行啦，今次你行前面。」

「喔……」死啦，今次整親阿琪，一定會搵機會哄返佢先得。