[愛情無限loop] 就係咁，我做左女神一年既備胎: ４７　ＧＯ　ＴＯ　ＳＨＯＰＰＩＮＧ

係等緊Ｄ人黎齊既時候，好似比阿富監視住咁，佢不停咁望住我係未ＳＤ緊ＭＳＧ，我一拎部電話出黎，佢就問係未阿琪搵我，同佢一齊等人都幾大壓力下。

最後终於都人齊，阿琪一到阿富就即刻問佢：「做咩唔應人？」語氣唔多好咁。

但阿琪佢無理阿富，一到左即刻行去我度，好似見到避風港咁，而ＪＵＤＹ份人不嬲都好直接，直接過我，佢聽到阿富咁問阿琪，就話：「唔想應未唔想應囉，有咩解。」

「ＷＥＬＬ～有時Ｄ淑女唔想理人，可能佢地唔得閒呢，你要知道淑女係好忙，要不停咁護膚架。」講呢句野既人緊係艾倫啦。

「今日咁多人，要買Ｄ咩野啊，等我呢個大隻仔幫手拎晒佢。」東尼呢個人係唔會放過任何一個可以ＳＨＯＷ　肌既事刻，佢伸出佢既大手瓜，講真，佢又真係真心好大隻。



「阿牛～」呂晨既嗲功又出現，「今日要好好陪人地買野野架～」

講真，佢呢一種女仔我真係唔受落，但係果兩隻狗公就望到流晒口水反晒白眼咁，聲音高潮咩叫你地。

但係佢地好快就投射左一目光比我，係咩野目光，未就係羨慕疾妒恨。

呂晨企左係我右邊，而阿琪就企左係我左邊，我當然不自覺咁向阿琪果邊靠過去啦，唔係我想食豆腐，而係呂晨佢想食我豆腐不停咁靠過黎我到，不過，好彩……

「行拿不如。」ＪＵＤＹ既一句後行左係我同呂晨既中間，幫我隔開左佢之餘仲推一推我一齊行，阿琪見到都跟左上黎，之後阿富佢地當然都跟左上黎啦。



而我就靜靜咁同ＪＵＤＹ講：「真係唔該晒。」

「唔該咩野啊，今日有排你過啊。」ＪＵＤＹ奸笑左下，好似一心等睇好戲，但又會幫我咁。

「妳唔會見死不救既。」我話。

「咁就要睇老娘既心情拿，不過我驚幫得一個時，幫唔到另一個。」ＪＵＤＹ講一講望一望跟住我地身後面既阿琪，「你知啦，你果位女神咁受歡迎。」

我傻笑左一下話：「咩真係咁容易睇得出我鐘意阿琪咩？金姐又係咁講。」



「盲既都知啦，不過牛兄，呢個阿琪不太冷，追佢要好落力同要同好多人爭架。」ＪＵＤＹ拍一拍我個膀頭。

「知道拿。」我好有信心咁點一點頭。

「不過我對你都有信心既，因為睇咁多人，你機會係最大。」佢話。

「咁多人？仲有好多人追阿琪咩？」我問。

「你呢Ｄ男人，咁遲鈍係唔會知架拿。」佢答我。

「咁女人有直覺，男人有鈍覺嘛。」我搞完個爛ＧＡＰ得我自己一個人笑。

「你地兩個傾咩野啊？」阿琪行左上前問傾緊計既我地。

比佢突如其來咁問一問，真係唔知點應佢好，但好彩ＪＵＤＹ醒目，「無啊，我都講緊要買Ｄ咩野打邊爐好姐。」



「我想食……」一講到食阿琪真好開心。

而我就係佢旁邊聽緊佢講野，但係，我旁邊感受既係快妹既氣氛，但身後就傳黎陣陣既殺氣……