[愛情無限loop] 就係咁，我做左女神一年既備胎: ３３　玩ＬＩＮＥ？奶就有得你玩！

因為件事整到成個人都悶悶不樂，就算同阿琪一齊食過飯，都只係開心過一陣就ＤＯＷＮ返。唔知點解，今日個夜晚特別靜，果種靜唔係講緊聲音，亦都唔係講緊環境，而係心境。

個心靜到，平時鄰居係隔離吵交就覺得煩，今晚竟然想聽下佢地究竟吵咩，靜到每日樓上淋花果陣一定會整到Ｄ衫濕想鬧爆佢，但今晚竟然望住Ｄ水滴濕Ｄ衫都唔理，靜到平時部電話會因為ＧＲＯＵＰ　Ｄ　ＭＳＧ勁多響唔停而整到我要熄左個提示，今日我就由佢響都唔介意。

腦入面不停諗今日三個人講過既野，果三個人，係阿琪、阿珍同埋阿塔。

愛一個人好傻，但等一個人仲傻……唔知，我會唔會變成阿珍咁樣，要等阿琪呢？如果係，我又可以等幾耐呢？

慢慢咁，我身邊每到一定時候，都會換左一批朋友……如果呢Ｄ係成為女神既代價，我諗阿琪一定會放棄唔做女神，雖然我識佢日子少，但我覺得佢會。



叫我比佢自己一個人好好咁走開，叫我尊重佢最後既灑脫，唔好再踐踏佢既尊嚴……究竟要對待到邊一個地步，一個人先會同另一個人講呢番說話呢？

我望住樓上滴落黎既水，不停係到反思緊，其實，有好多人自願做兵都無徵求其他人同意，咁樣都係一件煩事……

「死仔！」邊個，係邊個一巴打落本牛爺既頭度……「望住Ｄ水整濕Ｄ衫都唔幫手收！作死你啊！」原來係老牛大人。

「阿爸……」我傻笑咁望住老牛大人。

「都唔知係未你娘親生你時食錯野，生你生到成日傻笑咁，快Ｄ幫手啦，一陣你娘親見到實打死你。」老牛一邊收Ｄ衫遞比我，一路講。



「阿爸……」我話。

「咩事啊，口疾疾咁，搞大左邊條女個肚啊。」佢成日都係咁。

「邊有啊！我點敢！」我答。

「咁無用架，我係你咁大果陣已經搞大你娘親個肚啦，唔係點會生咁多。」佢一路講一路笑。

好耐都無同佢一齊收衫，而我係收衫時，就講左呢排發生既野佢知，當然包括阿珍同阿塔件事，而老牛大人既結論係：「都唔撚知你地而家Ｄ後生點拍拖既，都唔珍惜既。」



「唔珍惜？」我問。

「緊係啦，我同你娘親果陣邊有而家科技咁先進啊，無電話架我地兩個，約會早一日去到佢屋企話佢知，講好晒地點時間，第二日一定盡時到講果個地點，所有野排晒行程，點似而家咁，有ＷＨＡＴＳＡＰＰ有玩ＬＩＮＥ，有咩唔清楚ＳＥＮＤ個ＭＳＧ再問，但又唔撚知點解你地多左Ｄ咁方便既野，愈問仲可以愈唔清晰，約定都可以遲到，以前約地點有目的地，而家你地Ｄ後生約就興約果區等，唔見人，用係一個ＬＩＮＥ搞店，我果陣邊有ＬＩＮＥ玩，奶就有得我玩拿話你聽。」老牛大人一臉睬你都費事講，但又可以講得咁大段。

我聽到佢咁講後，笑左笑問：「玩奶啊，玩邊個架？」

「關你鬼事咩死仔。」佢又一巴打左落黎。

老牛大人又講得岩既，可能因為而家我地呢一輩太過唔珍惜，先會有咁多咁唔健康既愛情。