[愛情無限loop] 就係咁，我做左女神一年既備胎: ３１　阿琪的過去

我望住坐係我面前既阿琪，佢嘆住氣，督緊佢杯凍檸水走甜，就話：「其實我知道好多人都有背後話我，話我多人追，但又無唔拍拖，唔比機會人，話我鐘意做世界既焦點，話我鐘意收兵，但係，我一ｄ咁既諗法都無，我只係，唔想咁快拍拖住……」

「我上年先岩岩分左手，而家個ＥＸ仲不停煩住我，我有時返到屋企樓下都有可能撞到，唔係咁岩撞到，係佢伏我啊，佢有時會行過黎大巴大巴咁打我，話我點解要同佢分手，點解唔比機會佢，佢打完我，就扮可憐話無左我唔得，可唔可以比多次機會佢……」

「我每日都係呢一種惶恐下渡過你地又知唔知，我唔係唔想拍拖，而係對愛無左感覺，一個我以前好愛既人，可以變成傷害我既人，身理上既傷害不在話下，最大問題係，心理上既傷害……」

我望住阿琪，佢講講下流下眼淚，「有邊個唔想搵到一個愛既人然後一生一世，我本身都以為我個ＥＸ係，但估唔到佢同我阿爸一樣……我有個不幸既童年，阿爸由細到大對我同阿媽都唔好，我咁多年都係自己養自己……」

佢抬起頭，指左一個比較紅既地方話：「我以前自殺過，呢個係果陣留低既傷痕，我成日都會問，點解我要咁辛苦，其他人出世後有爸爸媽媽錫，但我呢，我就要自己養自己，仲要日日比爸爸打，我由細到大，阿爸同我慶祝一次生日都無……」



「我變得好需要安全感，我對身邊既人好好，因為我想佢地知道我既存在，亦都希望佢地都對我好好，幸運地，我真係有一班好好既朋友，但係卻又好不幸地，呢Ｄ朋友到最後都會離我而去……因為，每個對我好既男仔到最後都會鐘意我，而每個女仔朋友佢地鐘意既男仔，最後又會鐘意我，慢慢咁，我身邊每到一定時候，都會換左一批朋友，除左一Ｄ由細識到大既朋友外，呢幾年入面都係咁。」

「當你每次見到一班本身都好好感情既人，為左你一個人既感情而開始背叛、出賣，你會覺得好好受咩？我每次都唔想有咁既事情發生，但我就算控制到自己，都控制唔到其他人。」阿琪講完呢句後，就開左個ＷＨＡＴＡＰＰＳ出黎，比我睇左個ＬＩＳＴ又話：「呢度成幾十個人，係我唔識既人，係我無搵過佢既人，但都不停日日ＷＨＡＴＡＰＰＳ我問我做緊咩，問我今日過成點，我已經控制住自己唔覆佢地，就算我比佢地話無禮貌，比佢地話我絕情都好，我都唔覆，因為我知道，如果我一覆佢地既話，就多一分危險，但係……」

阿琪擦一擦眼淚又講：「我都係一個普誧人，我都只想好正常咁同其他人交朋友，但點解要講到我好似收兵咁。」

我聽完佢咁講後，都既嘆佢既苦況，我只可以用憐惜既目光望住佢，唔知邊度黎既勇氣，我用手擦一擦佢滑落臉龐既眼淚，然後講：「咁多年來辛苦妳拿，而家有我，好好休息下啦。」呢一句話，排除左我對佢既愛意的話，充滿左既係憐惜同疼愛。