[愛情無限loop] 就係咁，我做左女神一年既備胎: ２８　變質的義工

事情每日都係度惡化，直到有幾次，見到阿塔同阿珍已經唔會一齊出現，就知道，就算一齊出現，阿珍好熱情同阿塔打招呼，阿塔都唔多理阿珍。

而阿琪，佢喊少左覆阿塔既野，我又問過佢點解唔完全唔覆，佢話因為佢約左做義工，當佢問到義工Ｄ野，點都要覆一覆佢。

至於阿塔，佢好似變到同班狗公一樣咁憎我，佢一直都覺得係我同阿琪講左Ｄ野令到阿琪唔理佢。

佢地三個野既關係，波及埋我唔緊要，但係ＧＲＯＵＰ入面已經傳緊，大多數都係話阿塔剩係為左溝阿琪先跑步，而好明顯呢Ｄ說話係由班狗公傳出黎。

時間過得好快，快到已經到做義工既日子，本身去到既我因為果日工作上有Ｄ事去唔到，變到得返阿塔同阿琪兩個人去。阿塔緊係開心死啦，而阿琪就有Ｄ唔開心咁話：「……咁你下次一定要去架，你欠左我既。」



如果可以欠，可唔可以欠妳一輩子。

果日就算做緊野都心不在焉，成個腦都諗住阿琪同埋阿塔Ｄ野，直到晏就，佢地義工做完後幾個小時後，我收到阿塔既ＭＳＧ

阿塔：我諗阿琪鐘意我
我：點解？
阿塔：因為頭先佢坐車果陣俟住我

呢下衝擊對我黎講好大，然後我見到既係，ＧＲＯＵＰ入面阿塔報告今日去做義工Ｄ野，不過，原本做義工係好意義既好事，變成一件變左質既壞事。



阿塔：今日第一次做義工，感覺唔錯（笑）
阿珍：你無啦啦做咩義工？以前都唔見你做
會員３：感覺唔錯？
會員７：緊係啦，人地同阿琪一齊做義工ＷＯ
會員Ｎ：唔掛得感覺唔錯啦
阿珍：阿琪都有去？

我睇到呢到後，阿珍係另一邊ＳＥＮＤ　左個ＭＳＧ問我。

阿珍：阿塔佢同阿琪去做義工？


我：佢無同妳講？

我無再收到ＭＳＧ，但我可以肯定，阿塔無同阿珍講，而且，阿塔將件事搞大左……