[愛情無限loop] 就係咁，我做左女神一年既備胎: １９　結實的咬肌

我同阿琪跑完步……跑左陣都算係跑左步啦……然後就去食少少野，一路上同佢都有傾有講，我問下佢鐘意做Ｄ咩，佢又問下我既興趣，相處都幾好下。

係對話得知，原來阿琪佢好鐘意食野，仲係個大胃王，但係佢睇落一Ｄ都唔肥ＷＯ。

「妳就好啦，食極唔肥。」我好羨慕咁講：「我飲一飲水都會肥架。」

「但我阿媽成日話我唔生肉，女人瘦成咁唔好睇。」佢話。

「唔係啊，我覺得妳好標準好靚啊。」咦，好快快講左自己心聲出黎添。



「係咩，口花花。」阿琪聽到我咁講後，笑得好甜，然後又話：「但可能食得野多，咬肌發達得滯，整到我塊面好大。」

我望一望阿琪塊面，而佢又肯企定定比我望，「無啊，唔覺ＷＯ。」就係我講完呢句後，佢竟然捉住我隻手，摸落佢塊面度，然後話：「你摸下係呢度既肌肉係未好結實？」

我而家呢一刻真係鬼得閒理妳係未妳兩邊面咬肌結唔結實咩，我只係知道而家呢一刻，我同阿琪有肌膚之親，我當堂硬晒……我指我成個人企到硬一硬。

「係未好結實？」阿琪又問，而我就是但答左句，「……唔係幾識分。」

接落黎，係到佢伸左對手埋黎，摸……應該係托住我兩邊面，佢托左一托，然後笑住話：「你點解好似無咬肌既。」



姐係咁，我平時已經係好遲鈍既人，係咁既衝擊之下，我應機率簡直係０……死得，今次實死硬機。