[愛情無限loop] 就係咁，我做左女神一年既備胎: １７ 天使降臨
其他人姐係邊Ｄ人呢？呢個問題係我腦入面不停咁徘徊，唔通係其他追佢既人！？情敵！？ 「開始跑ＬＵ 好唔好啊？」就係我不停諗緊個問題既時候，阿琪就問我，而我回一回神就答佢：「⋯⋯好啊。」 呢個公園其實都幾大，大部分設施都係專為做運動既人而設，有個大型草地足球場、好幾個小型籃球場、小型足球場、仲有個可以舉辦運動會既小型運動場。 而我同阿琪就圍住外圍既跑步徑，今次我唔駛係佢後面跑，可以係佢旁邊跑，係呢一刻，我真係好似置身係天堂一樣⋯⋯望一望隔離既阿琪⋯⋯點解佢多左對翼既？係天使既翼啊！佢身邊既光芒，好暖啊！！！ 係未我有妄想症呢！？點解我望阿琪會係咁既。 就係我仲沉醉係阿琪既天堂入面果陣，突然一下痛擊打係我正前方，係啊，係我身體既正前方！唔通，係神打救我！？ 「阿牛！你無事嘛？」係阿琪既呼喚下，我醒左，原來剛才迎面而來既一條燈柱，我撞左上去，然後暈左。 我張大眼睛後，見到阿琪好擔心我既樣，然後，我慢慢坐左起身。 「你頭先嚇死我啊。」阿琪擔心咁話。 我呆左陣先清醒返，「我地唔係跑緊步咩？」 「仲跑，你頭先自己撞落條柱到啊。」阿琪唔知好嬲定好笑話。 我望一望條柱，然後再望一望阿琪，「係咩？」 佢望住我，本身忍緊笑既佢忍唔住大笑，「唔好意思啊⋯⋯我唔想笑架⋯⋯但真係忍唔到⋯⋯哈⋯⋯」
佢比左塊鏡仔我，我照一照，發現我左邊面係紅晒，而右邊面就白晒，「點解我半邊面變左關公咁！」我講完，阿琪笑得仲大聲，而我，都笑埋一份。