《我獲得一個願望，我選擇左係學校做一次男神》: 第四章：相愛？

返到屋企，見到男班長都走左，而且仲幫手收拾屋企啲雜物，我果然無識錯呢個巴打。
見到穎心個身開始郁動，但係臉上表情卻好辛苦，我即刻放低佢係張床到，衝去攞熱毛巾同暖水比佢飲，而我今晚都係訓廳，費事有咩誤會。

因為暑假既緣故，我訓到成１２點先起身，聞到廚房有陣香味同煮野食既聲，唔通，阿媽返左黎？明明佢同老豆兩公婆去左歐洲旅行，點會咁早返。
我行入去望下邊個煮緊野食，原來係穎心。望住佢，我呆左成足足５分鐘，見到佢好認真咁煮緊野食，又扎左個all back頭，我真係好想過去幫佢抹汗。
「咦，起身啦？快啲去刷牙洗面啦，就煮好啦。」見佢好甜咁對住我笑，仲要煮野比我食，我個心即刻軟左。
刷完牙，坐低左，穎心都擺緊啲飯餸係張枱到。
「嗱，我煮架，唔好食都要同我食晒佢。」女神吩咐到，一定食晒。
「係呢，你好翻啦，今日咁精神既？」
「一早好翻啦，訓左咁耐，我先唔似你，成隻豬咁，一起身就有野食。」




「嘻嘻。真係好有人煮飯比我食。」其實我想每一日都係咁，聞到穎心係屋企煮野食既味道，我就起身，然後攬下佢，一齊同枱食飯，幸福咁生活落去，但係，邊有咁易。
我地坐低一齊食野，望住佢，就諗起琴日佢比人捉走既情景，問心一句，究竟我有無能力保護到穎心，阿軒一日仍然存在，佢都唔會放過我同穎心。望住佢笑個樣，好幸福，好溫暖，但係幾時我會再見到穎心受痛苦，痛哭既樣？諗起都覺得好難受。

「食完啦，好好味啊。」雖則只係鹹魚白菜，番茄炒蛋，同埋燒味鋪既叉燒，但係已經好滿足，因為係穎心一手一腳為我煮既午餐。
「喂，係咪諗住食完野就走，要洗碗！」比穎心叫到，雖然唔願意，但係佢煮飯，我洗碗，都係天經地義。
「最多，我同你洗啦。」梗係好啦，可以同穎心一齊洗，好似兩公婆咁，真係羨煞旁人。
差唔多洗完既時候，我放低手上面既碗碟，我攬住穎心，佢都有少少愕然，但係佢都無推開我，而且，仲投入我既懷抱當中。
「喂啊，污糟架隻手，掂晒落我件衫到啦啲洗潔精。」佢當然唔係真係嬲我啦，只係發下小公主脾氣，都既可愛啊。
我一笑置之，洗埋剩低既碗碟，叫左穎心出去坐下。





佢係到睇電視，我出去陪佢，問左佢一個問題。
「穎心啊，我想問你一樣野。」我擺起我認真既樣。
「唔？咩事。」
「其實，我地係咪拍緊拖？」我知我咁問我白痴，亦都好無聊，但係我只係想知道我同穎心而家咩關係。
「嗯...我唔知點答你，但係我對你有好感囉。」好感？咁係咪即係鍾意？
「做咩無端端咁問？我趕時間，我要去學琴啦，得閒再約我出黎啦。」
我講野既機會都無，佢就走左，好彩，而家既我係男神，佢都唔會好抗拒，但係心裡面就好似好混亂咁，不過我唔會逼佢，因為我想知道，佢愛既係變左男神既我，定係毒男既我。

暑假過左差唔多一個禮拜，見自己踢波咁勁，梗係落街場挑下機，估唔到，我又真係幾好腳法，開角球都可以彎入龍門，睇到佢地呆晒，我又幾有滿足感。
踢完波，諗住行返屋企，電話又係有個無名氏揾我。




不知名號碼：「白志明，我知道你本身唔係男神，如果你唔想比人揭穿既話，就唔好再揾穎心，係咁。」
？！點解會比人知道我之前唔係男神，唔通係阿峰佢傳信息比我？佢上次見我送穎心翻屋企，塊面都黑黑地，唔通佢要威脅我？我即刻打比佢，但係佢話無傳信息黎，亦都無話比人聽呢件事。好，我信，而且，我而家唔變都變左，而且真係男神，除非，佢有我之前既黑歷史，咁就好難講。
我諗起阿軒，我要問清楚佢，我打比穎心，叫佢比阿軒既電話我，我亦都第一時間打比條友。「喂，你係咪知道啲野。」
「哈，聰明，你以前唔係男神，我一早就知道，信息係我傳既，聽唔聽話，你自己諗啦，哈！」聽見佢既笑聲真係想嘔，但係諗起自己大禍臨頭...