《我獲得一個願望，我選擇左係學校做一次男神》: 第三章：尋回

我同阿峰見到之後都起勢咁跑，都唔理有無咩陷阱，但係到達門口既我地，心知不妙，異口同聲咁講：「乜穎心唔係困左係５樓咩？」唉，中晒計。
呢個穎心只係投射出黎，為左要我地成個進入呢個圈套，所有門口已經關晒，仲聽到齊整既鎖門聲。

我抱頭痛哭，點解，點解做男神會變成咁，人做男神，我做男神，做到我咁失敗，如果比我揀多次，我寧願做返毒男，起碼唔洗經歷呢啲痛苦。
「明，唔好喊住，我地睇下附近有咩出路，比佢困係到唔係辦法。」阿峰個樣異常冷靜，可能佢靈魂已經嚇走左。
我收返啲鼻涕眼水，比穎心見到，我顏面何存，我挺起胸膛，但係心裡面卻無比咁痛。
我地周圍行，入面都有啲紅外線陷阱，但係我地已經純熟咁避開晒。
「兩位好，提提你地，你地得返半個鐘，抓緊時間阿，我唔想見到穎心隻手少左啲野啊。」
條友用場地喇叭廣播，我攞支槍出黎，係咁射落個喇叭到，我知道，射到個喇叭爛左，都救唔到穎心。
「喂，唔好晒晒啲子彈，好珍貴。」我冷靜落黎，阿峰幫我睇下仲有幾發子彈，好彩佢話有帶多排子彈。




「我知道你幾嬲，幾傷心，但係而家我地只有一個目標，就係救返穎心出黎，教唔教訓到條粉腸都係其次。」佢咁講，我都只好接受眼前事實。點解從前既我願意接受現實，無論點比人蛤，比人打，我都唔還手，但係變左做男神之後，我好介意身邊既野，自己變得好高傲，甚至比人敵視，原來我都係接受唔到，更加接受唔到我心愛既女仔比人傷害，好在頭先個幾發子彈幫我發洩晒出黎。


個到有條通風口，試下爬唔爬到。我同阿峰都唔係肥仔，都入到去，但係阿峰就比較辛苦，因為佢有啲肌肉頂住。
望下隻錶，得返２０分鐘，再係咁爬唔係辦法，我停左係到，再次攞起手槍，射落去我前面既位置，我今次開槍，唔係發洩，而係逃脫，射左一個正方格出黎，而通風口既構造都好薄下，我再用手推就成塊野跌左落地下，我同阿峰都隨即跳左落去。

周圍望下，發現呢到係更衣室，我地用跑既速度，返到會場外面。
終於跑到上五樓，得返７分鐘，我地用盡四隻眼，都被同一目標吸引住，就係一個黑布蒙頭，手腳被綁既人同埋一個男人企係隔離，我好清楚見到佢係粉腸軒，我差啲就想衝過去打佢，但係為左唔中佢既陷阱，我同阿峰都係慢慢行過去，而且我地都攞起左把手槍。

「終於黎啦？久違啊，兩位，呢個遊戲唔錯，不過下次要刺激啲先得。」下次？！我舉起手槍，諗住想射低阿軒既時候，外面有度強光射入黎，搞到我唔夠膽開槍，怕會射中穎心。度光越來越強，聽到大型落地玻璃碎裂既聲音，我知道個架應該係直升機，而且係接走阿軒既直升機；直升機放低條粗繩，拉走左阿軒，我今日亦都無機會報仇。




我即刻跑去穎心到，用火機燒爛綁住佢既麻繩，再幫佢解開黑布，但發覺佢已經暈左，見佢仲有呼吸，血色都咩異常，就抱左佢落去。
而家已經係凌晨一點左右，我地都絕對唔會報警，落返去既時候，都係比阿峰架車車我地返去。

「阿峰，多謝晒。」呢次真係欠佢一個人情，我亦順手比返把手槍佢。
「把手槍，我送比你啦。」唔係掛，比把手槍我？都好既，只好有咩事，都有把槍傍身。
「咁...穎心佢點？」阿峰咁問，我都唔知點安頓好佢，唔通要比佢係我屋企過夜？
「我帶佢翻屋企休息，你無問題？」我咁問都係想阿峰好過啲，話晒佢都鍾意穎心，亦救過佢一命。