《我獲得一個願望，我選擇左係學校做一次男神》: 第五章：宣戰

係電話到睇住自己個樣，覺得自己好慚愧，究竟我呢個男神係咪得軀殼，內心仍然係毒男？如果要完全得到穎心，只能夠除去外敵，即係阿軒。
「喂，粉腸，你咁想同我爭，夠唔夠膽同我光明正大咁決鬥？」我打電話比佢，決定宣戰。
「好，既然你出到聲，我接受你既挑戰，我地鬥三局，一人決定一句，最後個局由穎心決定，而且我地兩個係暑假唔可以揾佢，如果佢揾我地既話，就話我地決鬥緊，唔方便。」今次難得公平競爭，好！
「無問題，一言為定，暑假之後即刻開始決鬥！」 我隨即cut佢線，希望可以比啲信心自己。
睇黎呢個暑假要努力練波，我知道佢一定會同我鬥踢波。

但係首先我要有人同我練波，我即刻諗起阿峰同男班長，但係佢地又唔做運動，都係揾第二個算。
「第一個決鬥：踢波，揾１１個人，７個後備，唔能夠係本地球會球員，但係１８歲以下，１０月１號比賽，維園見。」呢個係阿軒傳比我既信息，既然係咁，睇黎我要係街到做下球探先得。
落到去維園，都幾多人係到踢波及，可能因為係暑假，咁就太好了，但係我憑咩叫人幫我踢場波呢。
「唔該，我想跟隊。」一個人膽粗粗去跟隊，好彩有位，仲要係我踢開既翼鋒。




上到場上面，大家都用不屑既眼光望住我，覺得我會拖累大家咁，但係我會用實力改變你地既睇法。

對方係中圈開波，我即刻埋去搶波，雖然對面前鋒好矮，但係腳法好細膩，差啲搞到我跌低，同時都感覺到背後既殺意極重。睇黎我要落足力去踢呢場比賽。
佢地不斷製造傳波，好難截到波，我企定，睇準機會，即刻跑左埋去佢地中場到，成功咁截到波。

我一直帶，係邊線到運球，遇上對面隊既防守中場，睇黎對住防中係一件好煩既事，我決定傳波比身後既右閘，我再向前跑，做個one-two，佢吊返粒波比我；今次見到既係對方右閘，身形彪悍，我將個波擺去右邊，當佢想伸腳踢走粒波既時候，我及時通左佢渠，仲搞到佢跌低埋，比我感受到超大既滿足感。

對住中堅，睇到隊友上前，仲揮埋手叫我傳波，我當然唔會傳啦，呢場係我個人show黎，所以我做左個假傳動作，令到中堅跳左起身，但我就繼續推入禁區，佢既速度亦追唔上。

黎到最後一關既龍門，差唔多到１５米既距離，我用左腳一下假射，再放返個波黎右腳，最終射左去龍門右邊，即係近處位。






隊友們不屑既樣貌已經消失左，反而係羨慕既眼光，好似見到美斯係球場上咁，當我話想走個陣，成隊人都好唔想我走，仲話要教佢地踢波，咁就太好了，成功做到我想要既目的。
「你踢波咁勁既，不如教下我地踢波啊。」「係囉。」 頭先同我同隊既都圍晒過黎，甚至係對面隊既都有。
「好，但係我有一個條件，就係要係１０月１幫我踢場比賽。」 見佢地議論紛紛咁，唔係唔得下話。
「去！一定去，有得同美斯踢波，點都去！ 」哈，估唔到，佢地呢班友仔又幾順攤。
「同埋呢，大家叫我阿明得架啦；既然係咁，你地都交低電話號碼比我，等我約你地出黎個陣方便啲。」當然，佢地全部都係１８歲以下，見佢地個樣同我差唔多咁大，我諗最大都係我添啊。
「大家記得準時出席練習，贏左場波，我送份大禮比大家。」其實我講呢句，都係為左激勵士氣，無諗過送咩比佢地。
返到屋企沖涼，既然第一局佢諗左，係時候諗係第二局鬥啲咩。
不過有樣野諗唔明，既然阿軒有我把柄，仲點解要同我鬥？唔通佢真係咁想贏我咩。