《我獲得一個願望，我選擇左係學校做一次男神》: 第八十章：坦白

我覺得無論點都好，作為穎心至愛，佢亦有權知道我三日之後會死既事實。

「穎心啊。」

「你起返身先啊。」

「做咩啊？」

「我想話你知，我三日之後，就會死。」





「唔好講笑啦，好無聊囉。」

「我認真架，三日之後，我就會離開呢個世界。」當我講出口既時候，好似每一隻字都好重咁，講極都講唔出口，真係要好大勇氣。

「唔好玩啦，你無端端點解會死啊。」

「係將我變成男神個個話要懲罰我，我亦心甘情願。」

「你心甘情願，咁我呢？我點算啊。」穎心開始喊起黎，我亦摸下佢塊面，抹下啲眼淚。





「對唔住，我今生欠你，下世一定會還比你。」

「白痴明，我唔要下世先還比我，係要而家，今生今世啊！」見到穎心開始崩潰，不過呢個都係我預期之內，聽到自己愛人無端端話三日後就死，我相信無人能夠接受到。



「點解你要同我講...我寧願你突然之間離開，都唔好比我有心理準備，要睇住你離開。」

「所以我決定呢三日，每一刻都要同你一齊。」





「我唔明啊，點解你要應承佢，話三日後可以死。」

「既然，我已經可以同到你一齊，我死而無憾；雖然對你好唔公平，但係我相信，你一定會揾到一個比我更好，更錫你既男仔。」

「唔要啊！我邊個都唔要啊！你係咪傻左啊，我凈係愛你一個，凈係會同你一齊架咋，我邊個都唔要...嗚嗚...」係呢一刻，我都唔知可以點樣安慰穎心。

「呢三日，你唔可以離開我。」睇黎穎心睇開左少少。

「嗯，一步不離。」

等穎心平復好心情，同佢傾多陣計，令到佢開心返，笑返為止。不過，咁樣傾，已經等到黃昏既來臨。

「好啦，我等陣返去就會計劃下呢三日會同你去邊架啦。」

「比你講多次！」





「下，有咩問題...」

「係我地等陣返去啊，講好形影不離架嘛。」

「係喎...」

穎心打左我個頭一下，同時我拖住左佢隻手。

「穎心，同你一齊我覺得好幸福，我呢一世都無諗過可以同你一齊，即使中四個年我同你表白都好，我都係毫無信心，先會暈低，但係而家，我覺得一齊都好虛幻。」

「係咪話我好假啊而家。」

「唔係，我真心覺得我能夠配得上你，係我既榮幸。」





「白痴明！愛情係無分階級架，就算你係咩身份，咩背景都好，只要你係白痴明，我就鍾意。」

「多謝你...」知道穎心知道我就黎離開呢個世界都好，佢對我既愛始終如一。






我地等到日落，就一齊返去啦。

係夕陽下，見到一對情侶既背影，女仔挨住男仔既膊頭，一個淒美既背影；雖然日落短暫，但係呢個美好既風景，可以叫人放低一切，靜靜望住鹹蛋黃既落下，鹹蛋黃既落下，正正代表一日既結束，又或者，代表一個人既結束。









「今日個黃昏好靚啊。」

「梗係啦，有我陪你睇喎。」

「但係...」我知道穎心想講咩。

「無論我去左邊到，只要你望住個天，阿明就會係個到，到時咪唔使怕無人陪你睇日落囉。」

「哼，口花花。」

「行啦，傻妹。」

我拖住穎心，殘餘既昏線照射住我地離開，有緣，再見。





返到我屋企，穎心唔知點解又開始係到喊。

「做咩啊，穎心？」

「我好唔捨得你啊。」

「我都係...」殘酷既結局已成事實，已經無得改變...

「穎心，呢三日，將會係你人生最難忘既三日，亦係我送比你最後既一份禮物。」

「既然係咁，呢三日既行程就等我預備啦。」

「好，就睇下你會點樣比一個難忘既旅程我。」




我坐低開始準備同穎心人生最後既一段旅程，穎心亦坐係我隔黎，但係就無特登睇入面既內容，只係翹住我隻手，另一隻手就係到寫日記。