《我獲得一個願望，我選擇左係學校做一次男神》: 第七十九章：四季

「白志明，上次有話未講完，今次打擾你，係想同你講，由聼日開始計起，你剩低三日命，你點用呢三日命我唔理，但係三日之後，就會死。」

「嗯，多謝你。」

「記住，係十一月四號夜晚十二點正。」

「對我黎講，已經好公平。」

「雖然你而家追返穎心，但係你實在對唔住太多人，不過你最對唔住既都係自己，好好利用呢三日，上面見。」







第二朝起身，我無忘記到「後生阿伯」所同我講既野，我知道自己三日後就會死，但係我無感到唔開心，我唯一擔心，只有穎心。

所以我決定，呢三日，每一刻都陪住佢。









「穎心，咁早幾今日？」穎心今日八點幾就黎到醫院，仲帶左啲水果黎。

「係啊，今日唔使返學咪早啲黎探你囉。」

「食左早餐未啊你？」

「食左啦，你呢？」

「我無食啊。」





「都知你唔鍾意醫院啲野食架啦，食生果啦。」

穎心係到搣橙比我食，好溫馨既場景，我想每一日都有穎心咁樣搣橙比我食。

「使唔使餵埋你食啊，病人。」

「最好添啦。」

「擘大口啦。」

「啊...」

「唔係比我食架咩，又自己食左...」穎心係都要玩我既，擺到嘴邊又擺落自己個口到。

「唔餵就算，我自己食。」





「餵啦，餵啦，擘大口，乖。」

係柔和既光線照射下，病房見唔到兩人既樣貌，見到背影後既溫馨，甜蜜；不過，呢個畫面仲可以維持幾耐？

「好味。」

「成個小朋友咁。」穎心再幫我抹一抹個嘴。




「話時話，你英國個邊搞成點？」

「英國個邊？我一早同左屋企人講要同個男人分手啦，所以你唔使擔心，我唯一既老公只會係你。」可怕你之後發現無可能。





「咁就好啦。」




「白志明先生？」

「係。」

「晨曦？」

「我黎同你講返份報告架，報告話你無野架啦，而家就可以出院，不過都要提返你，唔好再飲咁多酒啦。」呵，第時想飲都無得飲啦。

「唔該晒。」








我地拾好野，搞掂出院手續就搭的士離開。

「不如我地去食野啊，你都未食早餐。」而家都係得十點幾，可以食咩...

「無所謂啊。」

「咁我地去食個brunch啊。」

「司機，麻煩去銅鑼灣世貿啊。」

「世貿有咩食架？」





「去到咪知囉。」




落到車，行左十秒都無，穎心就停左落黎。

「你想帶我黎既就係呢間野？」呢間野並唔係係世貿入面，而係係世貿隔黎一條街。

「係啊，係咪好正呢。」見到穎心個樣好似十年無食過野咁，不過真係佩服佢可以一早就食啲咁heavy既野。

「估唔到日本野都會咁早開門。」

「咁人哋無位坐，通常都係比人企係條街或者一到行一到食架嘛。」

「而呢到既招牌菜就係生蠔。」




我地買左一盒壽司，一打生蠔；哈，估唔到穎心仲特登去買左支迷你白酒送生蠔，真係食家。

「我地不如過去海旁食啊？」

「好。」海旁，真係帶比我無盡既回憶。




「嗯，好味，啲生蠔好滑啊。」唔請穎心去做飲食節目真係浪費。

「你都試下啦。」穎心再次餵我食野，我都好乖咁擘大口。

「又幾好味喎。」

「都話架啦。」

「嘻嘻。」

「傻妹。」

穎心訓左落我大臂上面，而我望住個海，摸住穎心既頭髮，其實心裡面真係唔想咁快離開。




「我想以後都係咁同你生活落去。」

「我都係。」

「同你一齊，我好開心，好幸福，無野需要煩。」究竟我幾時先要對穎心坦白....

佢一直訓係我大臂上面，我地一句聲都無出過，因為我地都係係到享受緊呢刻既寧靜。