《我獲得一個願望，我選擇左係學校做一次男神》: 第六十六章：幸福

「我粒聲唔出走左，係因為要揾我親生仔。」親生仔？龍叔佢同女神凈係拍過拖，點生個仔出黎...

「而阿成就係我親生仔。」

「下？」我仲諗住男班長都會同我一齊下，但係我望下佢，佢個樣又好似無乜野。

「其實我同Ice拍拖個陣已經生左個仔出黎，只係得我同佢知道，而一切都係意外。」意外...我諗我明啦，難怪男班長同龍叔既年紀都唔係好似正常父子咁差好遠；不過年少真係輕狂。

「咁點解你要掉低我？」男班長終於出聲。





「對唔住，我同Ice個陣都無錢養你，只好將你安放係保良局，等有錢人家去收養你。但係阿成，我白鹿青承認欠你一個美滿既人生。」

「算啦，邊有人可以擁有一個美滿既人生？我無親生老豆都好幾十年，而家又多左個親生老豆，叫我點搞。」係，男班長係比一個雙親家庭收養，直到而家都係。

「咁你肯唔肯認我呢個親生老豆，我入個獄，殺過人，我只係想問你一句，你肯唔肯原唔諒我？」龍叔第一次講野咁有感情...

「邊有人唔肯認自己親生老豆？係就係衰啲，但係始終都係親生老豆，邊個都比唔上。」男班長真係大個仔，開始明白事理，真係感動。

「今日咁開心，飲杯！」龍叔呢分人最鍾意就係咁，熟絡左就嬉皮笑臉，真係猜唔透佢。






「阿明，你個樣好似唔係幾開心喎。」

「係囉，唔通你唔鄧我地父子重逢高興咩？」

「唔係，你地重逢左啫，但係我未呢。」

「哦，又係穎心啊？」

我點頭示意，都真係唔想開口講。





「估到你啦，男人唔係煩錢就煩女人，睇你個樣你都唔洗愁無錢住，但係女人就令到你好愁喎。」龍叔即刻街市佬上身，呢啲人去街市唔係去買餸，目的而係去吹水。

「你咁醒目，我試下唔話比你知，睇下你估唔估到。」

「喂，大佬，你當我邊個啊？心理學家唔係你肚入面條腸喎。」

「你又離譜左啲既，提示都無個就叫人估你個故事。」哎呀，一相認就夾攻我，好野。

「唉，怕左你兩父子。」

「嗱，係我中四個年，我同女神表白，個女神叫穎心，但係係表白個陣，我又無端端暈左，好似係嚇到暈左，一起身，我就係學校頒獎台上面，而且我個樣，性格都完全唔同晒，成個男神咁款，其實即係我而家咁既樣，跟住落黎，就係故事既重點...」我一直同龍叔講我既故事，不論係芊雪，晨曦，阿峰，Vincy，甚至係個個賤人軒都好，我都一一講晒比龍叔知，佢亦聽得津津有味，但係全程只有我講，龍叔一句都無講過，只係不斷點頭，同埋「嗯」，究竟佢有無聽我講野，定係只係扮聽到好似津津有味咁。







「講完啦？」

聽到幾聲零碎掌聲，加上一聲吞啤酒既聲音，迎接我故事既暫時完結。

「係。」我講完咁耐，龍叔只係咁既回應，我有啲不滿。

「聽左咁耐，我只能夠講，你好幸福。」

「同埋你會好後悔。」

「幸福？後悔？到呢一刻我都未感覺到幸福，不過後悔就的確有少少，不過而家後悔又有咩用？過左去就過左去，點追都追唔返。」

「你如果唔係變左男神，你會有咁多埋怨？如果你唔係為自己外表驕傲，你會夠膽去識女仔？你諗下以前你係點樣既男仔，實際上，你係一個異性朋友都無，但係而家，你有得揀，更加係比人揀個個，你仲話自己唔幸福？仲係到埋怨？」龍叔講野，我真係駁唔到佢，佢無大聲夾惡咁同我講野，而係佢既理性，比大聲，比惡，更加有說服力。

「而後悔，我相信你而家都開始有，但係係之後你既後悔會令你更加痛；當你再唔追返穎心，而且見到佢有男朋友，要結婚，同第二個行禮，要生仔，係社交網站發放同老公同埋個BB一齊既自拍，一齊成長既過程；更加經歷過婚姻好多野，波折也好，恩愛也好，但係個個男人並唔係你既時候，你後唔後悔？」





我吞左啖口水，明明穎心可以離我好近，但係而家，好似已經離我好遠，好遠，唔係講緊個人，而係講緊個心...