《我獲得一個願望，我選擇左係學校做一次男神》: 第六十三章：一雪前恥

「咇！２比０！」見到個比數係上半場已經擴大到咁，真係好難追。
「阿明...」隊友都紛紛望住我呢個隊長，肩負係隊長呢個重任，真係好難，承受住壓力，輸贏都要係球場上面帶領住，就好似係戰場上既將軍一樣...
「大家，頂住！」上半場最後５分鐘，我地都唯有死守，避免再次比人入波。

「咇！咇！」上半場完結既哨子聲響起，大家隨隨走入更衣室，大家個樣都好沮喪。
「大家！唔好氣餒，仲有四十五分鐘比我地追，贏波既機會仲留緊比我地。」
「大家仲記唔記得點解要一齊踢波。」
「我話過，無論輸贏都好，只要開開心心踢完場波，每一場都係最漂亮既一場，包括呢一場，何況我地仲有一個目標，就係同港超冠軍踢。」

「無錯！我地今日咁辛苦黎到呢個地步，就咁輸左咪好唔抵，今次開開心心咁踢之餘，我地要朝住我地目標去踢！踢出個未來！」哇，阿元你咁老土既野都講得出口既？不過好感動，你令我地都振奮起黎，我相信，下半場先係真正既比賽。




「我地叫聲！」
「３，２，１！UST！！」

下半場開始，我同阿元臉上露出笑容，一切已經釋懷，無論點都好，我地知道今場波，係我地人生裡面最精彩
既一場。

「阿元！」我再次叫阿元，諗住長傳比佢，但係其實我只係想呃佢地既後衛，當佢地望晒去阿元到，我已經跑過左一個後衛。
面對住龍門，見識過佢既實力，的確好犀利，但係黎到禁區，就係前鋒同守門員既表演。
「呀！」我前面就係對方既守門員，我無理過要射邊到，只係用盡全力一射，我亦都唔敢望個波飛左去邊...





好香，係廚房見到阿峰煮緊早餐，背影好似阿明，差啲搞到我衝埋去攬住佢。

「早晨阿峰。」
「咦，早晨喎，做咩咁早起身？」
「聞到咁香既早餐，係人都會醒啦。」
「一起身把口咁甜既？食左蜜糖黎啊？」
「嘻嘻。」
「你去刷牙洗面先啦，未食得架。」
「好啦。」





望住鏡入面既我，個樣越黎越成熟，雖然咁講有啲驕傲，但係真係不得不讚自己靚左好多，仲好似香港個個咩黃穎心添。
熟悉既場景，但係出面好多野，都係唔係屬於我，包括阿峰，當然我指既唔係真係阿峰，而係阿明。佢為我煮飯，為我係橋上面跑去機場，我都知道，但係我為佢做過啲咩呢？係，感情唔應該計較付出，但係我欠阿明實在太多，我決定，用盡一切方法，我都要要同阿明一齊。

「咇！」２比１啊！！
我立即跑向隊友，佢地都衝晒過黎，簡直好似贏左場波咁。
「好波阿明！我地跟住落黎都要咁，我地中場會支援你地，你地就努力入波啦，我地勝利在望！」

「睇黎我地要強硬啲。」
「嗯。」當我跑返去我個邊既時候，聽到阿軒同冰倫既對話，兩個人真係物以類聚，一樣咁奸險。
「嗯，好味。」估唔到阿峰煮野食都有一手。
「係咪呢，我平時都要煮飯比女朋友食架。」
「做你女朋友都好幸福喎。」
「邊係，阿明煮野食好食過我啦...」
「嗯...」
「我係咪講錯野。」




「唔係，我只係有啲掛住佢。」
「好辛苦，真係好辛苦，當我擁有過好多野既時候，我先發現最初，最純潔既個份愛先係適合我。」
「咁你都唔想既，根本就唔係你既選擇，你都逼不得已啫。」
「所以我決定左一個禮拜之內返香港，甚至以後都唔返黎英國，跟住同阿明一齊，拍拖，結婚。」
「乜你覺得佢仲愛你咩...」阿峰講完呢句，我個心真係碎左，連碎片都消散埋。
「未試過又點知呢？」我仲以笑回答佢，掩飾我內心有幾咁痛。
「咁又係，可能佢依然咁愛你呢。」
其實我真係唔能夠肯定佢愛我，或許佢愛既係以前既我。

返到黎球場上，好明顯，佢地轉左戰術，而且係全體攻擊既戰術，令到我地好攰，不斷跑動，係到消耗我地既體力，但係佢地好似一啲體力都無用過咁，依然踢得好暢順。
「軒！」佢地傳波傳得差唔多，冰倫突然黎一個吊傳，笠過我地既後衛，阿軒更加突破越位，自己面對龍門，向右邊輕鬆一射...
但係我地既龍門撲錯方向，世上最好彩既事莫過於此；雖然佢撲錯方向，但係對腳就勾到個波皮，改變方向，只係比對方一個角球，而唔係入球。
「大家守住，得返十分鐘，我地唔可以再失波！」
角球開出，砍到落對方一個較高既後衛，我地龍門亦唔矮，跳起雙手拍出，此時，波落係我腳下。