《我獲得一個願望，我選擇左係學校做一次男神》: 第四十七章：誓愛

係我諗緊點樣同芊雪表白既時候，不如揾晨曦啊，雖然揾佢有啲唔知羞，但係都未嘗唔係一件壞事。



每一個私人護士都有辦公室，而晨曦既辦公室就係係龍叔個病房隔黎，經過走廊，再次見到我同龍叔係到傾計既背影，不禁有啲失落。

「晨曦？」我敲完門，都無人應，門又無鎖，就直接入左去。

「揾我做咩事？」原來佢做緊野，佢見到我都會比個靚笑容我。





「無啊，想向你請教下啲野啫...」今次大獲了，明明頭先仲覺得無恥，而家就完全唔敢開聲問。

「講啦，今日我無病人要睇架。」咁就太好了。

「我想鎖一鎖門，可唔可以？」雖然孤男寡女獨處一室，但係我地唔會重複犯錯。

「其實我想同芊雪表白...」雖然望唔到自己個樣，但係感覺到自己好熱。

「哦...你想我點幫你，哈。」見到佢唔係黑面，仲反而樂意幫我，真係要請晨曦食多幾次飯。





「嗯...點樣係醫院做一個最浪漫既表白...」的確，係醫院咁限制性既地方表白，係難左啲。

「係醫院，仲要浪漫，難左啲。」

「唔緊要架，唔一定係今日既。」其實心諗梗係越快越好啦。

「好，我幫你諗下，遲啲諗好啲idea再話你知。」

「一言為定，多謝你，晨曦。」





「唔洗，係我欠你。」呢句野，有啲含義。

返到房，睇左陣電話，搜尋下點樣表白係最浪漫，但係地點絕對唔會係醫院，呢點令我感到無比絕望。

我真係好想出多去一次，不過既然芊雪會擔心，我都唔好意思啦。




「阿明，我過緊黎，同你傾下你要表白件事，你可以嗎？」果然係女性，效率立即見效。



「咁快有idea？犀利喎。」





「嘻嘻，都係以前啲男仔同我表白得返黎既。」

「哦，女神黎喎。」

「唔好講啦，講到我都怕羞添。」

「好啦，咁你講有咩諗頭？」

「不如你煮一餐飯比芊雪啊。」煮飯？係我頭上面應該有千萬個問號。

「係啊，你唔好同我講你唔識煮野食喎。」其實我以前真係唔識，就算煮都凈係會煮公仔麵，而家做緊男神既我，我都煮過飯比人食，味道都唔錯。

「識就識，但係醫院邊到可以比我煮？」

「我梗係有辦法先同你講啦，跟我黎。」一直行，一條熟悉既路線，我已經估到晨曦帶我去邊。





「嗱，呢到咁大個廚房，遲啲就係你既舞台啦。」

「估唔到你啲人脈去埋廚房咁犀利。」見到晨曦，所有廚師，侍應都停晒手，靜晒，晨曦呢個人真係唔簡單。

「大家繼續做野啦，唔洗理我，我帶佢黎參觀架咋。」

「點解你可以有權控制成個廚房既？」

「唔話你知。」晨曦講完就伸脷，係到扮可愛。

「咁你想煮咩餸比芊雪？」

「我未諗啊，邊有咁快諗到，至少都今晚先答到你啦。」





「咁好啦，你慢慢諗，聽日你下就十二點開始入黎，佢地就會隨時幫你煮呢餐飯架啦。」換言之，我有成幾個鐘頭煮，到時煮九大簋都得啦。

「今次真係唔該晒你，不單只幫我諗idea，仲幫我揾廚房。」

「係喎，咁啲餸係邊到買？」

「傻既，咁大個廚房你驚無餸煮？」比佢敲左落我個頭到添。

「但係，我想煮啲高水準啲既野比芊雪食喎。」

「咁啊，你同我講想煮咩，我出去幫你買。」我猶豫左一陣。

「你啊？得唔得架。」其實我真係有少少質疑晨曦。

「梗係得啦，唔係既話，我以前都唔會係到做大廚啦。」咩話！大廚？仲要係之前就係大廚？唔怪得成個廚房啲人都對佢咁恭敬。





「咁而家信未？」

「信啦，一定信，信心保證。」




去到夜晚，我仍然未諗到有咩可以煮，無理由係醫院煮牛排比佢食啊，而且我係諗住係花園同佢食，所以牛排，燭光晚餐就免啦。



「晨曦，我諗到啦。」我whatsapp晨曦，希望佢未訓收到我信息啦。

「係？講黎聽下。」

「我諗住整一個愛心飯盒。」

「Woo，幾有意思喎。」

「餸呢就係一下呢啲啦：生菜沙律...」

講完一大輪之後，晨曦已經下線，可能太夜已經訓著左，因為我係凌晨兩點先揾佢，自己都覺得有啲唔好意思。