《我獲得一個願望，我選擇左係學校做一次男神》: 第四十六章：消失

經過一晚反复思考之後，我都係去求問下龍叔點先可以係醫院做一場完美表白。

龍叔既病房係係東面，我就係西面，要行成條走廊先去到佢個區。

係一條用落地玻璃既走廊上，見到外面就係我成日同龍叔傾計既花園，由一開始以為佢係痴線佬，到而家先知佢咁健談，可能係我成個開解左佢啦，龍叔亦成為我解悶節目之一。



我入去之前都會敲下門，如果龍叔訓緊就費事嘈醒佢啦。





「咦，龍叔呢？」

「先生，請問你係到做咩呢？」回頭一望，原來係晨曦...

「晨曦...」

「係你啊，做咩過左黎既？」

「無啊，想過黎揾龍叔傾計啫。」





「龍叔？邊個龍叔？」唔係掛，唔通我撞鬼？無理由啊，芊雪都見過佢。

「就住係呢間房個個中佬喎。」

「係啊，但係佢唔係叫龍叔，佢叫白鹿青喎。」白鹿青！？

「下？」

「係啊，佢個名好特別所以我先記得既，平時我地都叫佢做鹿叔。」鹿同龍都幾大分別喎，但係點解佢要呃我呢？





「唔理啦，咁佢人呢？」見到床已經收拾好，行李雜物已經無晒，完全係準備緊比下一個病人住。

「佢出左院啦。」哦，都唔出奇既，佢都話自己會出院，只係估唔到會咁快就出院啫。

「哦，咁好啦，希望我出左去可以見返佢啦。」我都無難為晨曦，無話要攞龍叔...鹿叔電話，不過我只係好奇點解佢要呃我，話自己叫龍叔...

「你食左早餐未啊？」晨曦咁問我都應該想叫我一齊食早餐，做私人護士真係得閒...

「唔啦，我今日同芊雪食，等我出院再請你食飯啦。」

「好啦。」

晨曦離開左我視線，望住一間虛空既病房，雖然唔係人死，但係走得突然，好似穎心離開我咁，總係會令人傷感。

「呼...」





「我以後係醫院仲有邊個同我傾計...」

我行近龍叔既床邊，我都係鍾意叫佢做龍叔多啲。雖然人已經不見，但係仍然感覺到一絲男人味。

咦，今次留下既終於唔係紙條，而係一隻戒指。

戒指，點解晨曦唔攞走？可能晨曦真係良心發現，將貪念埋沒，又或者龍叔留啲左啲野想同我講呢。

我望住隻戒指，一隻好普通銀戒，上面寫住兩個英文字。

Dragon同埋 Ice。我諗呢個就係龍叔個英文名同埋跳樓個位女仔...

如果留比我，咁又想表達啲咩？玩偵探遊戲咩。







「去左邊！係唔係又偷走出去！」我收到芊雪send比我既whatsapp，睇黎我要返去揾佢。




「到左啦？」

「你去左邊！」佢一黎就搣我塊面，都唔比人解釋既。

「我去左揾龍叔。」

「龍叔？上次同我傾計個個？」





「嗯。」

「佢走左啦。」

「走左？走得咁突然既...」

「係出院，唔係死左。」我細細力敲佢個頭，佢就立即怒睥返我。

「咁都好突然喎。」突然，係啊，穎心都走得好突然...做咩成日諗起人呢？人哋都有自己生活啦。

「算啦，我地去食早餐先啦。」

醫院早餐都係不外如是，無咩值得一提，只不過我成程都攞住隻戒指黎睇，亦都比芊雪發現左戒指既存在。








「咦？做咩有隻戒指既？」芊雪見到隻戒指，個樣好甜，好好奇；女人都係嚮往浪漫既婚禮。

「無啊，龍叔留比我架。」

靜左十秒，我都估到芊雪諗緊咩。

「我，唔係Hehe！」

「哈！！笑死我咩，中佬與小鮮肉既愛情故事！哈！...」真係救命，係芊雪先會諗埋呢啲野。

「點解你唔問龍叔做咩要留低隻戒指架。」

「咁你講啊。」

「其實，佢出左院我都唔知，當我想去揾佢既時候，先知道佢凈係留左隻戒指比我。」

「嗯...有古怪...」

「個名係龍叔同埋邊個架？」睇黎龍叔係個次傾計無同佢講自己既經歷，我都費事同人講。

「唔知啊，可能係佢女朋友掛。」

人既好奇心真係累死人，搞到我心思思，想知道龍叔係邊，想知道龍叔點解隱瞞自己叫鹿叔，雖然係好小事，但係執著永遠都係我既作風。