《我獲得一個願望，我選擇左係學校做一次男神》: 第二十三章：冬天 聖誕

係阿明入院既日子，咁啱係聖誕節，亦都係倒數既日子，我都唔能夠同佢一齊過，希望佢會掛念我啦。
今日好凍啊，天文台今日話得十度咋，唔知阿明佢有無著夠衫呢？不如我織條頸巾比佢啊，等佢感覺到我帶比佢既溫暖。
距離聖誕節仲有一個禮拜，應該夠時間既。夜晚食完飯，係太古海旁行左陣，大家都著住厚厚既外套，係酒吧外面既暖爐取暖，係對面行緊既我，好似有少少既落寞。

係不遠，我望到熟悉既面孔，其實都唔係熟悉既，只係有過見面之緣。
「阿軒？咁啱既？」阿軒今日著得好型，一套銀灰色的西裝，梳左個all back，感覺好fresh。
「咦，你係...」阿軒咁快唔認得我架。
「我係阿雪啊，上次比你撞跌碗粥個個女仔啊。」搞錯，阿軒身邊一定好多女仔！唔係既話，我咁靚女，佢都可以遺忘...唔知點解，咁都可以有少少失望。
「哦，阿雪！」都唔知係咪真係記得返人...
「哼，頭先你唔記得我喎，而家又咁快記得返？」




「咁你講到我整跌你碗粥喎，梗係記得返啦。係喎，你朋友無事阿嘛？」
「算你啦，我朋友好返好多啦。」
「阿軒啊，點解你今日着得咁formal既？」
「無啊，我啱啱去完飲，而家係呢到行下先返屋企。」
「咁啱我都係呢到行下，不如一齊囉。」話音未落，佢就搭住我膊頭，聞到一陣既香水味，並唔濃烈，而且聞落去好舒服，好想訓覺...

「咦，呢到邊到黎架？」周圍黑漆一片，只係見到窗外仍有少許街燈照射入黎。
「歡迎黎到密室。」一把用左變聲器既男聲音，唔知係邊到傳出，一直都好怕黑既我，仲要配上恐怖既男人聲。我馬上睇下門口係邊，但係我發覺自己原來被麻繩綁住，好彩唔係綁得好實，chok幾chok就鬆綁。
「咁快就走？收埋份禮物先啦。」點解，把聲變返做普通人既聲？
燈光逐漸明亮起黎，望下周圍，發覺都好華麗，甚至係金碧輝煌，係一間豪宅，而企係我前面既正係阿軒。





「你...？」係我腦海中，空白一片，唔知比咩反應好，因為阿軒攞住扎鮮玫瑰。
「阿雪，可唔可以做我女朋友？我係一個好怕羞既人黎，要帶你黎我屋企，我都唔敢開聲，只好搭你膊頭，迷暈你，先帶黎你呢到；所以，請你接受我既誠意同勇氣。」佢情深默默咁望住我，遞左扎玫瑰比我。此時此刻，我好迷茫啊！

「Sorry，我諗我唔可以接受你。」雖然係阿軒面前，有一種無形既氣場壓逼緊我，但係清醒既頭腦提醒我，阿明仲係醫院到；如果我接受阿軒既話，阿明一定會好唔開心，我都覺得自己背叛左阿明咁，雖然我係幾鍾意阿軒，但係未至於要咁快拍拖，而且拍既話都係同明仔拍先...
「噢，好，唔緊要，我相信我既心意，你已經收到。咁我地不如交換電話啊？以後出黎食餐飯都好啊。」我相信阿軒呢一種唔係叫唔知羞，而係風度，所以我都應承左交換電話，而朋友食餐飯，無壞啊。

阿軒呢個人好特別咁出現係我人生裡面，亦都好特別既方法向我表白，可惜我拒絕左，愛情也許唔能夠出現得太快，否則離開都會變得好快。
返到屋企，我都開始織頸巾比阿明。
「阿女，織緊頸巾比男朋友啊？」問完之後，仲要恥笑我！




「唔係啊！媽咪唔好亂諗野，我比朋友架咋。」講到咁慌張，係人都覺得我講緊大話啦。
「其實阿媽我唔介意你拍拖喎，而家你都讀大學啦，唔係凈係掛住讀書架啦，要顧慮埋自己將來幸福架。」媽咪輕輕拍左我個頭一下，好似將成句野塞左入我個腦到，搞到我成晚都訓唔著，唉，我都想拍拖，但係無合適既人選，阿軒又唔係唔好，只係發展得太快，阿明就... 我都唔知啊！

唔夠訓既我，起身已經食午餐，好彩今日開始放聖誕假，可以出街　shopping，可惜天氣唔好，落緊大雨。
「阿女，我煮左飯係廚房，你叮熱佢啦。」講完之後，就急速咁離開屋企。

唉，聖誕節都要係屋企食飯，好頹啊，唯有食完飯去探阿明啦。
見今日落雨，我都係搭的士去醫院，同埋我都想快啲見到阿明。

「阿明，點啊你，食左飯未？」
「食左啦，放假都黎探我？唔出去玩既？」
「今日落雨喎，而且又無人約我。」芊雪個樣好似有少少失落。
「咁我約你囉。」
「你可以約我去邊啊，最多咪黎呢個花園，同埋好似係我自己過黎架喎。」
「怕左你，見係聖誕，送比你。」阿明係身後攞左枝花出黎，而且枝花濕濕地，我諗都阿明係冒住雨係對面花叢到偷返黎，雖然唔係一大扎玫瑰，但係一枝普通既花，但係叫人有莫名既感動。




「多謝你啊，下次病就唔好冒雨偷花啦，嘻嘻。」
「比你發現左添。」最後，我地只係相擁左兩秒，卻感到無比既長。
「我要走啦，聽日再黎探你啦。」
「芊雪啊，其實你唔洗日日黎探我架喎，你都有自己既生活，而且難得放假，你去享受下聖誕氣氛啦。」
阿明呀，你明唔明啊，我既生活就係你，我唔黎探你，只會覺得少左啲野，如果你覺得我黎探你會煩到你既，咁sorry，我可以以後都唔黎。
「嗯... 我都係走先啦。」
做咩芊雪一走就唔開心既？唔通佢唔捨得我？哈哈，日日都可以探我都唔捨得，真係傻。