《我獲得一個願望，我選擇左係學校做一次男神》: 第二十四章：怪人

你話我係醫院咁耐究竟可以做咩？你知我無得講野係會死，凈係靠每日芊雪黎探我先有得傾計，連啲護士都唔得閒，我就黎鬱悶死。

所以我每日都黎花園睇下有無人可以比我撩下，但係我每次黎到，都有個男人坐左係長凳到，唔講野，望住個花叢，到一點就會準時離開。有次見到佢個樣，都幾恐怖下，左邊臉狹有條疤痕，右手斷左兩隻手指，最慘既係佢只有一隻眼，而我就咁睇呢個男人應該都頂多四十歲。開頭我都唔敢接觸佢，但係作為社會上未來既社工，就算個人幾樣衰，幾黑你憎，你都要幫佢；我諗由而家開始「實習」都唔錯。
「你好，我叫阿白。」其實陌生人都係叫我阿白算，尤其是比較奇怪既陌生人...
「呵。」佢把聲好沙，好乾，甚至好似喉嚨無口水咁。
「點解，你夠膽坐係我隔離。」佢講每一句野都好辛苦，唔似無氣，但係要慢慢逐個字講出黎。
「你知唔知，連啲護士，醫生，都唔會我呢個病人，你，憑咩同我講野。」呼，深呼吸，要冷靜，雖然佢係有少少恐怖，但係大家都係男人，唔怕！
「同你講多最後一句，我係，殺人犯！」講完呢句，佢已經走左，係佢第一次未到一點就走左，我諗佢唔想有人打擾佢，但係我好似咩都未講，佢就走左；坐係佢身邊，真係感覺到一絲既殺氣，從佢身上肌肉，紋身，都知佢好打之人。

鍾意接受挑戰既我，點會咁快放棄呢？我決定每日同樣時間，用我既真誠去打動佢，只求佢同我打開個心去長談一次就夠。




第二日既正午，我早過中年男人坐係長凳到，過左５分鐘，佢都未黎到，唔通佢又知我會揾佢？
「邊個比你坐係呢到。」我回頭一望，就係我等緊既人。佢緊握拳頭，青筋暴露晒出黎，單眼既怒視已經可以嚇死人，真係名符其實既凶神惡煞。
「我.. 唔坐得架咩？」我特登咁講，的確係些少挑釁佢，但係其實熬緊底。
「你究竟想點。」佢逐步行緊我，我已經唔敢直視佢，到最後，佢只係坐左係我身邊。
我再望返住佢，男人既怒氣已經消散，睇黎成功黎我不遠。
「我想同你傾計。」我都開門見山同佢講，係奇怪左少少，但係我就係喜歡同啲有經歷既人傾計，而呢個中年男人睇落去身經百戰，仲話自己係殺人犯。
「傾計？我同任何人都無野傾，包括你，請你離開。」
「我想知，呢個位，邊個同你坐。」佢突然望過黎，然後顯露左失落既樣出黎。
「呼...你咁想知，我都無妨話你知，怕左你。」Yes！我都差啲叫左出聲，呢招竟然有效，太好了，聽下佢有咩經歷先。





「我叫白希龍，就黎四十歲。」
「話說係二十幾年前，我同左一個女仔拍拖，個陣讀緊高中，即係好似你差唔多既年紀，我鍾意左個女神，但係我只係一個毒男，日日返學就係比人打，比人欺凌，而學校亦唔會理呢啲野，因為已經司空見慣。你會諗，一個毒男點同女神一齊，一齊左都唔會幸福，但係事實並唔係咁，心水清既我，知道一個中學生擁有最多既，係青春。」講到呢到，佢可能太攰，都飲左啖水，先繼續。
「長話短說，為左女神，我不惜一切，改造自己，係身形，外貌，性格，學業，運動等等方面，我都窮盡一生既力量投資係高中既兩年上面。」
「不過題外話，女神唔算特別靚，但係就平凡帶點氣質，先係真正既女神，而唔係成面粉。佢有一把烏黑秀發，經常扎all back頭，五官端正，特別在有一對深啡色同黑色既鴛鴦眼；身形均勻，無任何贅肉，而且都有170cm，每次諗起佢，都會覺得好甜。」點解，有啲似穎心...
「講返正題，我唔講我點樣能力去健身，做運動，溫書，甚至去信教磨練性格，去吸引女神既目光。當我同女神表白既時候，佢無答我，因為佢真係選擇緊我同另一位男仔，而另外個個係學校霸道王，成日侍著自己有啲家底，恐嚇我，叫我唔準再追女神，但係我無聽佢講，因為我知道付出既一定比個蛋散多，所以我係絕對唔會放棄。」阿龍好似講到越黎越嬲，不過都識自己冷靜返，再飲啖水；同時我諗緊點解啲劇情咁似而家發生緊...唔係咁老土下話。