《我獲得一個願望，我選擇左係學校做一次男神》: 第二十一章：頑強 芊雪

「做咩喊啊？」我即刻行埋去佢身邊，蹲係佢隔離。
「我好開心，我好耐無食過住家飯，多謝你。」佢攬左落黎，無再喊，係芊雪既心裡應該有一種不能訴說既喜悅。
「點解你話你好耐無食過住家飯既？」難道芊雪一早就失去家人？
「你想唔想聽故事啊，不過唔想都要聽架啦。」其實我最喜歡就係聽故事，讀社工，點能夠唔喜歡呢？

「其實好簡單，係我細個個陣，屋企好窮，媽媽就一日打四份工，為左比我讀書，媽媽真係仆心仆命去做野，但係身體就越黎越差，而老豆就凈係識賭錢，搞到屋企收支失衡，我就變左做洩氣工具...」芊雪開始講到哽咽，但我無阻止佢繼續講；唯有將心裡面個條刺分擔比你信得過既人，傷痕先會逐漸減退。
「而我逼於無奈，為求幫補家計，都要出去做兼職，希望幫到媽咪既病情；唔知可唔可以話天公做美，媽咪係佢返餐廳個陣，老闆睇上左佢，話要娶佢返去，佢當然應承啦，而家佢兩個已經結左婚，但係就話唔想要我，因為想二人世界... 」唉，比人當波拋黎拋去，仲以為真係咁錫個女。而芊雪自己又無能力獨自生存...
「不過，佢地都有啲良心既，定時會寄錢比我，知道我讀大學，都話會供我讀埋上去，但係之後讀完大學，就唔會再理我生死。」咁都叫有良心？我懷疑你阿媽都唔係親自生你出黎，生完等於無生過咁，人性何在！
「算啦，我唯一鍾意既就係媽咪煮既住家飯，有時得閒就會去佢老公到食飯，不過到我中四個年就再無叫我上去食飯，我無遺忘媽媽既手勢，更加無遺忘佢煮比我既最後一餐飯，就係同你煮既一模一樣，同埋一樣咁好食。」竟然可以咁巧合，一開始係穎心煮比我，而家我就煮比芊雪，但係原來芊雪阿媽都煮過同樣既餸，緣分真係緣分。





「呼，好舒服，我從來都無同人講過我既身世，我唔鍾意人哋笑我，更加唔鍾意人哋批評我既屋企人。」點解芊雪可以善良到咁，當佢屋企人都唔認自己個女既時候，反而個女仲係外人面前維護自己既親人，世界上，邊到仲會有啲咁既女仔。
「講完啦，搞到啲餸凍晒添，我幫你叮返熱啲餸啦。」
「唔洗啦，啲餸仲熱架，你試下啦。」我即刻擺舊蕃茄入口，證明啲餸真係仲熱。
「好啦，見你咁比心機去煮呢餐飯，等陣我幫你洗碗啦。」

食飯個陣，我地坐係大家對面，一開始芊雪都乖乖地坐係到；但係食食下，就攞隻腳撩我，以我性格，點會唔還手呢？我都開始還擊，實力上，佢梗係輸比我啦，最後我蹺住佢對腳，唔比佢郁，佢先肯乖乖地食飯。
芊雪食量都比一般女仔大，甚至可以媲美一個男仔，但係身形就幾均勻，只係矮啲，但就無贅肉。
「食完啦我。」佢放低筷子，以光速跑左入我間房到，仲要鎖埋門，呵，又話洗碗，得個講字。
聽到開門既聲音，我都望左過去。
睇黎，我都係要自己收拾埋啲碗碟架啦。




「睇下，係咪好啱身呢？」哈，原來芊雪係我間房到揾我件白T出黎，仲著埋我條波褲。
「件T就黎長過你個人啦喎。」我恥笑佢咁講。
「不過幾得意。」
「嘻嘻，我梗係換左衫先洗碗啦，點可以整污糟我條裙架。」不知不覺，芊雪已經佔領埋我間房同我啲衫，呢個細路女既佔有慾真係強。
「啲碗碟等緊你啊，請。」見佢好似有啲唔願意咁。
「你唔係唔陪我洗下嘛。」又擺個可憐樣出黎，都係想我屈服姐。
我態都未表，佢就已經拉左我入廚房。

係廚房既背影帶著一絲既回憶，係我同穎心既回憶，唔知點解，有啲觸感。
「洗碗啦，係到發夢，諗緊咩啊。」我當然唔會同佢講諗緊第二個女仔啦，唔驚佢洗支洗潔精塞落我個口到咩。




「無啊，諗緊出院之後有咩想做咋嘛。」好差既大話。
「等我幫你諗下啦，不如我地去溫書啦，你成個sem都無上堂，話你知啊，我今年想GPA有四。」咩話，第一年讀大學就咁勤力，真係估你唔到。