《我獲得一個願望，我選擇左係學校做一次男神》: 第二十章：重拾信心

套冰河世紀都無咩特別，芊雪都可以笑到好似小朋友咁，搞到全個戲院啲人都望過黎，佢先識收斂返，但係之後仍然嘻嘻哈哈大笑。
睇睇下，芊雪拖住左我隻手，但係我知道我地既關係未至於係咁，所以我都係鬆開左隻手，再望下芊雪，佢即刻扁嘴，甚至想喊咁既樣，但係如果我唔鬆手，只會令關係變質，再唔係簡單既友誼。
睇完套戲，芊雪都係黑住面。睇黎我要同佢講清楚。
「芊雪啊。」「咩？」
「我想同你講，我地...」「得，咩都唔洗講，我唔知點解你可以錫我壓頭，但係我想拖下你都唔得，我只係想拖住個屋企人姐，點解咁都唔得...」屋企人？原來芊雪都已經當左我係佢屋企人，的確我又錫左佢壓頭...唉，係我衰既。

芊雪開始痛哭，我地仲要企係戲院門口，好尷尬，我即刻拖左佢係廁所門口。
「得啦，比你拖啦，係我衰啦。」點解每個女仔同我有少少感情，就會喊，芊雪係咁，穎心都係咁。
「係咪架，你話架。」原來係到扮野，想我哄返你，真係激死。
跟住我地都去左揾野食，成程我都比佢拖住我，費事佢又係到扭計；不過我都係第一次拖住女仔出街，比旁人望住既感覺雖然有啲奇怪，以為我拖住左個妹妹，而且今日芊雪又著得咁靚，搞到我都有啲自傲。





「阿明啊，不如我地返屋企食呀。」
「返屋企？返邊個屋企啊？」做咩無端端要返屋企食既，條街又咁多野食。
「梗係你屋企啦，何況你屋企都無人。」
「我屋企無野食架喎，你煮啊？」
「我煮咪我煮，怕你啊！」不是吧，芊雪識得煮野食？係我記憶中，識得煮野食，又煮得好食既女性，好似得我阿媽，而家係我生命中識煮野食既多左一個女仔，咁咪可以成日食到住家飯囉，不過咁諗好似自私左少少，睇下芊雪煮野技巧如何先。
「屋企無餸架，要去街市買餸。」
「我唔會去架，我今日著得咁靚，唔可以整污糟架。」公主病又發作，下次都係叫佢唔好著裙出街。
「咁我都要知你買咩餸架嘛，大小姐。」怕左佢，我都係幫佢買算。
「求其啦，買咩都好。你比條鎖匙我，我返屋企訓覺，你返黎叫醒我啦。」返屋企...呢個芊雪已經當我屋企係佢屋企，仲要我比條鎖匙佢，但係我又願意屈服，呼，男人就係咁。





佢就搭車返左我屋企，係返我屋企，我都唔知點解可以係咁，真係哭笑不得，而家就剩返我係街市到遊蕩，唔知買咩餸比佢煮好，再諗下平時我最鍾意阿媽煮啲咩餸，就買比芊雪煮啦！
其實我無乜點去街市，發覺原來買餸都幾貴下，唔知係咪見我個樣戆居，收我貴啲。
返到屋企，我先發覺芊雪話自己去訓覺，鎖匙就係入面，好彩門口地墊有條士啤。
入到屋，唔通芊雪真係訓左教？除左對高踭鞋，就唔見左人；我擺低啲餸係廚房，睇下阿爸阿媽間房，無人，即係佢訓左我間房啦。

為免擾人清夢，我都係細細力推開對門，見到芊雪真係訓左係我張床到，大字型訓左係到，好彩有蓋被，唔係既話凍死佢，開到個冷氣咁鬼死凍，以為自己入左殮房。
我行近芊雪到，望住佢晶瑩剔透既皮膚，我都摸左佢塊面一下，佢即刻郁左一下，嚇死，仲以整醒左佢添，見佢擘大個口，梗係趁機整蠱下佢，首先同芊雪影左張自拍，跟住擺左隻手指入去，感受到佢呼吸既熱氣，話佢係細路女真係一啲都無錯。
見佢訓到流晒口水，我都費事叫佢起身煮飯，睇黎我要使出我久違既大廚功架。
希望我煮完之後，啲飯餸既香氣可以叫醒芊雪啦。





雖然只係蕃茄炒蛋，燒味鋪既叉燒同埋一碟白菜；唔知點解，枱面上既餸菜，好似似曾相識，但係又唔記得幾時有食過...
當芊雪慢慢行出黎既時候，我記得，穎心為我煮既第一餐飯，原來我都忘記係我生命中識煮飯既仲有穎心...
「好香啊，咩味黎架。」芊雪赤住腳，眼都未擘大，就行左出黎，但係一見到枱面上面擺晒啲飯餸係到，就好似金睛火眼咁，精神百倍。
「哇，你煮架，真係好香啊。」呢個細路女成個頭哄落啲餸到係到聞，好似未聞過啲餸味咁，仲差啲將頭髮浸埋落去。
「食野啦，你齋聞就飽架啦？咁你唔好食啦。」
「嗚呼，蛤人既，唔比人食野，虐待兒童啊。」你都知你係兒童啦咩？真係。
「講笑咋，食飯啦，凍晒唔好食啦。」
「嘻嘻，等我試下明仔既手勢先。」

我都唔食住，特登睇下佢食第一啖有咩感覺。
「嗯，幾好食喎。」點解好食都唔洗搞到眼眶出淚珠下話。
「做咩感動到喊啊，係咪太好食？」
當我講完呢句之後，芊雪真係喊左出黎。